Është rikthyer dhuna në futbollin shqiptar. Skena të turpshme kanë ndodhur sot në përfundim të ndeshjes mes Shkumbinit dhe Dinamos në Peqin.
Pasi gjyqtari Sokol Bebja fërshëlleu për të mbyllur takimin në rezultatin 1-1, disa persona janë futur në fushë dhe e kanë goditur dhe grushte.
Megjithëse mori goditje nga mbështetës të Shkumbinit, ai e ruajti qetësinë dhe me ndihmën e forcave të sigurisë arriti të largohet nga stadiumi. Ky fenomen është i përsëritur në Peqin dhe kësaj radhe, klubi i Shkumbinit rrezikon dënimin e rëndë, duke parë dhe shembullin e Kamzës sezonin e shkuar.
Me ndyshimet e reja në Kodin Penal goditja ose vepra të tjera dhune ndaj sportistit, trajnerit, arbitrit, ndërmjetësit sportiv, për shkak të veprimtarisë sportive, nga persona jashtë kësaj veprimtarie, dënohet me burgim nga një deri në tre vjet. Po kjo vepër, kur kryhet në ambiente sportive, më shumë se një herë, apo është kryer nga drejtues apo anëtarë të klubeve sportive, dënohet me burgim nga një deri në pesë vjet burg.
Klubi i Dinamos ka reaguar në faqen zyrtare në Facebook, duke u distancuar nga ky episod. “Çdo ndeshje e Dinamos në transfertë po shoqërohet me presione që nuk kanë lidhje me fushën e lojës. Në fund të ndeshjes së sotme është dhunuar arbitri Sokol Bebja! Nuk është hera e parë që faktorë të jashtëm mundohen të ndikojnë në fatet e ndeshjes. Dinamo ka qenë, është dhe do të jetë gjithmonë Fair-Play, brenda dhe jashtë fushe”. Megjithatë ky postim është fshirë disa orë më vonë nga faqja e tyre.
Nga ana tjetër, klubi i Shkumbinit e ka cilësuar ‘komedi të turpshme’ ndeshjen e sotme. “ Perfundon komedia me e turpshme e pare ne Peqin. Sokol Bebja turpi i gjykimit ka mbyllur takimin Shkumbini – Dinamo 1 – 1”, shkruhet në faqen zyrtare të klubit në Facebook. /Opinion.al
