U bënë tashmë tre muaj që Abigail Isabelle ka ardhur në jetë dhe Aurela ndihet e plotësuar. Tanimë janë dy shpirtra që i ka edhe më pranë. Nuk ka qenë një shtatzëni e lehtë, disa muaj regjim shtrati e të tjerë më pak, por sot është shumë e lumtur mes Grace dhe Abigail Isabelle: “Nuk do të ndihesha kurrë e plotësuar në profesionin dhe gjithҫka që kam, nëse nuk do të kisha këto dy shpirtra që kam tani. Më ka ndryshuar jeta. Më ka ndryshuar jeta vetëm për këto të dyja. Tani nuk jetoj më për vete, por për ato të dyja”, – tregon Aurela e ftuar pasditen e sotme në “Rudina.”
Edhe pse statusin e nënës e përjetoi për herë të parë pothuaj 6 vjet më parë, pas lindjes së Abigail, Aurela përjetoi po të njëjtat ndjesi: “Thonë që për herë të dytë mësohesh, po unë kuptova që nuk u mësova dot..” – tregon këngëtarja për ndryshimet mes dy bijave, shkruan class.
Në fillim, jo vetëm për Aurelën dhe Skerdin, por edhe për Grace, ardhja e dikujt tjetër në shtëpi nuk ishte e thjeshtë. Vogëlushja 6-vjeҫare kishte kuptuar që vëmendja nuk ishte aq e madhe sa para ardhjes së motrës së vogël. Por Aurela tregon se me kalimin e kohës u mësua, aq sa nuk i ndahet Abigail për asnjë moment.
Në ndryshim nga shtatzënia e parë, e dyta me Abigail ka qenë më e vështirë: “Të dyja vajzat kanë qenë të ndryshme. Me Grace, pak para lindjes kam kënduar, kam xhiruar klipe, kam bërë koncerte live, kam inҫizuar një koncert të tërë, ndërsa me Abin ka qenë e vështirë. Për disa kohë, regjim shtrati absolut. Pastaj periudha e fundit sërish e vështirë.”
Por diҫka që këngëtares së njohur i ka mbetur merak janë edhe komentet në profilet sociale e sidomos ato që i referoheshin ca kileve më tepër: “Më vinte keq që njerëzit ma vinin në duke “je shëndoshur”, në një kohë që unë as nuk mendoja për këtë, por vetëm për atë krijesë që prisja”, – tregon Aurela e keqardhur edhe për komentet.
Duke ndarë me publikun edhe emocionet e lindjes, Aurela tregon se për ҫudinë e saj dhe të të gjithëve, në sallën e operacionit, ajo zbuloi se ishte frikacake, aq sa këmbëngulte që ta vinin në gjumë e të mos ndiente: “Vetëm mjekët mund ta tregojnë se ҫfarë kam kaluar në sallën e lindjes.”
Për emrin e veҫantë me të cilin Aurela dhe Skerdi pagëzuan vajzën e tyre të dytë, Aurela tha se plotësoi dëshirën e bashkëshortit: “Skerdi donte ta quanim Abigail (gëzimi i babit), ndërsa unë këmbëngulja edhe për një emër tjetër, derisa i propozova Isabelle (e përkushtuar në Zot) dhe ai vendosi që t’i kemi të dyja.”
Shumë shpejt, këngëtarja do të fillojë koncertet live, klipet dhe projektet e reja, të cilat do t’i prezantojë së shpejti edhe në publik.
