Alfred Alku, 36 vjeç dhe Ornela Alku, 32 vjeç, banues në Tiranë, burrë dhe grua kanë arritur të mashtrojnë shumë njerëz duke u marrë në total 430 mijë euro. Policia tha se e ka prangosur çiftin që ishte shpallur në kërkim për mashtrim me shuma të mëdha parash. Operacioni policor i koduar “Exchange” arrestoi dy mashtruesit dhe sekuestroi një sasi të vogël parash në krahasim me sasinë që ata kanë arritur te zhvatin tek qytetarët.
“Ndalimi i këtyre shtetasve u bë pasi këta shtetas kanë qenë të shpallur në kërkim nga Seksioni i hetimit të krimit ekonomik dhe financiar, pasi në bashkëpunim me njëri- tjetrin, iu kanë marrë shtetasve të ndryshëm shuma të konsiderueshme parash ( në euro dhe valutë), me vlerë 430.000 euro. Në cilësinë e provës materiale u sekuestruan: 773.400 lek, 450 euro, 100 dollarë dhe 350 paund”, thuhet në njoftimin e policisë.
Opinion.al mësoi se çifti u merrte para njerëzve me premtimin se do tu kthente në valutë një shumë më të madhe se sa ajo fillestare.
Materialet u referuan në Prokurorinë e Rrethit Gjyqësor në ngarkim të tyre, për veprën penale
“Mashtrim i kryer në bashkëpunim”, parashikuar nga Neni 143/3 i Kodit Penal. Vjedhja e pasurisë me anë të gënjeshtrës ose shpërdorimit të besimit dënohet me gjobë ose me burgim gjer në pesë vjet.
Po kjo vepër, kur kryhet në bashkëpunim në dëm të disa personave ose më shumë se një herë, dënohet me burgim nga tre gjer në dhjetë vjet dhe, kur ka sjellë pasoja të rënda, me burgim nga dhjetë gjer në njëzet vjet. /Opinion.al
