Pika kufitare e Qafë Thanës është rihapur për punëtorët sezonalë, Sipas Tv Klan janë mbi 8 mijë qytetarë shqiptarë dhe të huaj që kanë hyrë dhe dalë nga kjo pikë doganore në harkun kohor të 24 orëve të fundit.
Fluksi më i lartë i lëvizjeve është rregjistruar në hyrje të territorit tonë me mbi 4.500 persona shumica prej të cilëve i janë drejtuar zonave bregdetare për pushime.
I lartë vazhdon të jetë edhe numri i daljeve nga vendi ynë në drejtim të vendit fqinj. Burime zyrtare pohojnë se nga Shqipëria drejt Maqedonisë së Veriut në 24 orët e fundit kanë dalë 3770 shtetas.
Këtë të hënë autoritetet e vendit fqinj ka lejuar kalimin e shumicës së punëtorëve sezonalë, me përjashtim të 10 personave që janë ndaluar nga pala maqedonase për shkak se nuk justifikonin arsyen e udhëtimit.
Punëtorë sezonalë u ndaluan të kalojnë për 3 ditë me radhë në kufi, me pretendimin se nuk plotësonin dokumentacionet e kalimit. Ndërkohë ky vendim kishte lidhje edhe me vdekjen e një shqiptari disa ditë më parë pranë Ohrit.
