Janë rihapur hetimet për çështjen shumë të debatuar të privatizimit të OSHEE tek cekët e CEZ-it në kohën kur qeverinë e drejtonte Sali Berisha. Mësohet se djali i ish-Kryeministrit Berisha, Shkëlzen Berisha, ka marrë një fletë-thirrje për të dëshmuar në Prokurorinë e Tiranës, në lidhje me çështjen e privatizimit të OSSH-së.
Gazeta Panorama duke cituar burime nga organi i akuzës, shkruan se fletë-thirrja është dërguar, pasi çështjen e ka marrë në dorë prokurori, Ardian Braho.
Shkëlzen Berisha do të pyetet dhe do të japë sqarime në lidhje me rolin e tij në privatizimin e OSSH-së. Megjithatë, burimet zyrtare në Prokurorinë e Tiranës, të kontaktuara nga “Panorama“, nuk e mohuan, por as edhe e pranuan se një fletëthirrje e tillë është dërguar për Shkëlzen Berishën.
Për çështjen e privatizimit të OSSH-së, është ngritur edhe Komisioni Hetimor Parlamentar, të cilin kanë dëshmuar, ish-Kryeministri Berisha si edhe Shkëlzen Berisha. Gjithashtu, në të ka dëshmuar edhe Romeo Kara, ish-juristi i OSHEE-së, që mbrojti Shqipërinë në Arbitrazhin Ndërkombëtar me çekët.
Pasi Komisioni përfundoi punën e tij, e çoi çështjen në muajin shtator në Prokurorinë e Tiranës. Mirëpo, pas 10 ditësh, çështja në ngarkim të ish-zyrtarëve shtetërorë u pushua nga prokurorja Alma Brati. Pas kësaj, Kuvendi e ankimoi çështjen në Gjykatën e Tiranës, e cila vendosi mospushimin e hetimeve. Këtë muaj, çështja iu caktua prokurorit Ardian Braho, i cili po heton sërish këtë çështje.
