Ministri i Brendshëm i Kosovës, Hyseni ka pranuar se pas afërsisht një viti “pushim” kanë rinisur ikjet e qytetarëve nga Kosova për në frontet e luftës në Siri apo Irak.
“Nga fundi i muajit shtator kemi gjashtë raste, dy prej të cilave i kemi konfirmuar që kanë arritur në vatrat e krizës përmes rrugëve të ndryshme. Pra, flasim me shifra, raste të regjistruara, sepse nuk e përjashtojmë asnjëherë mundësinë që ndonjë i radikalizuar të gjej rrugë të treta”, ka thënë Hyseni.
Aktualisht, sipas autoriteteve në Prishtinë, janë rreth 70 qytetarë nga Kosova që ndodhen në zonat e konfliktit në Siri apo edhe Irak. Ndërkohë, që nga viti 2013, Policia e Kosovës ka hapur hetime për mbi 200 persona. Sipas shënimeve zyrtare, janë arrestuar 119 persona dhe deri tash janë dënuar 35 prej tyre.
