Trupi i pajetë i taksistit, Faik Fezgaj nga Durrësi është gjetur në një kanal me ujë në zonën e Gosës së Kavajës, në rrugën e Vil Bashtovës. Makina Mercedes Benz, ngjyrë blu, “Taxi” me targa DR443A u gjet e përmbysur në një kanal. Sapo policia nxorri mjetin në fund ishte dhe trupi i 53 vjeçarit Faik Fezgaj.
Ai rezultonte i zhdukur që të mërkurën në mbrëmje. Policia e Durrësit nisi kërkimet pas denoncimit të familjarëve të tij. Pas gjetjes së makinës në kanal, janë rritur dyshimet për një ngjarje kriminale megjithatë po verifikohen shkaqet, nëse është një vrasje, apo aksident.
Njoftimi i policisë
Rreth orës 09:44, në fashatin Vil Bashtovë, nga shërbimet e Policisë Rrogozhinë, është vënë re një mjet në brendësi të një kanali me ujë. Menjëherë është bërë sigurimi i vendit të ngjarjes dhe nxjerrja e automjetit nga uji, ku në brendësi të mjetit në vendin e drejtuesit, ndodhet trupi i pajetë i një mashkulli.
Grupi hetimor në vendin e ngjarjes ka bërë të mundur identifikimin e drejtuesit të automjetit, shtetasi F. F., 53 vjeç dhe automjetit tip Mercedes Benz, me targë DR443A, të raportuar të zhdukur nga D.V.P. Durrës. Po punohet për zbardhjen e rrethanave të kësaj ngjarje.
