Kryetari i Lidhjes Socialiste Demokrate, Zoran Zaev ka dhënë dorëheqjen nga posti i kryeministrit dhe si kryetari i LSDM-së. Vendimi i tij vjen pas humbjes së zgjedhjeve lokale.
Zaev u shpreh se është krenar për anëtarësimin e vendit në NATO dhe rezultatet në proceset integruese të Bashkimit Evropian.
Në një konferencë për mediat, ai tha se, do të qëndroj derisa të krijohet një shumicë e re parlamentare.
“Jap dorëheqjen nga pozita e kryeministrit dhe nga posti i kryetarit të LSDM-së”, tha Zaev duke shtuar se ai personalisht merr përgjegjësi për humbjen në zgjedhje.
Ndërkohë, partia opozitare, VMRO-DPMNE shpalli fitoren në shumicën e komunave në balotazhin për zgjedhjet lokale që u mbajtën sot në Maqedoninë e Veriut.
Zaev pas disfatës së partisë së tij në raundin e parë të zgjedhjeve lokale më 17 tetor kishte paralajmëruar dorëheqjen nëse partia e tij humb zgjedhjet në raundin e dytë, në veçanti në Shkup.
Kryetari i Lidhjes Social Demokrate, Zoran Zaev, u zgjodh për herë të parë në postin e kryeministrit në Maqedonisë së Veriut më 31 maj të vitit 2017 pas zgjedhjeve të parakohshme parlamentare që ishin mbajtur në vitin 2016. Ai në krye të qeverisë u zgjodh me votat e të gjitha partive politike shqiptare pasi LSDM në zgjidhje ishte mundur nga VMRO DPMNE me rezultat të ngushtë apo me një dallim prej dy mandateve të deputetit.
Gjatë këtij mandati Zaev mori përsipër vendime të rëndësishme, siç është ai me Greqinë për ndryshimin e emrit kushtetues të Maqedonisë së Veriut, e cila deri para Marrëveshjes së Prespës së arritur më 17 qershor 2018 quhej “Republika e Maqedonisë”.
Pavarësisht kritikave të shumta në opinion lidhur me këtë marrëveshje, por edhe negociatave më pas me Bullgarinë për marrëveshjen e fqinjësisë së mirë, që po ashtu konsiderohet si e dëmshme për interesat kombëtare maqedonase, Zoran Zaev fiton edhe zgjedhjet e rregullta parlamentare, që u mbajtën në qershor të vitit 2020. Edhe në këto zgjedhje, partia e social demokratit, Zoran Zaev fitoi me rezultat të ngushë dhe ishin sërish partitë shqiptare, që i mundësoi formimin e qeverisë së re.
