Valmir Elezi, zëdhënës në KomisioniN Qendror të Zgjedhjeve thotë se ende nuk dihet numri i saktë i votave me kusht, votave me postë edhe votave të personave me nevoja te veçanta.
“Nga votat me postë kanë arritur rreth 16 mijë pako të supozuara me fletëvotime të cilat kanë ardhur në adresë të KQZ-së. Pas shqyrtimit dhe verifikimit, ne mund të dimë saktë sa është numri i fletëvotimeve, po ashtu do të dihet saktë se sa është numri i fletëvotimeve të aprovuara dhe sa të refuzuara, pasi që mund të ndodhë që dikush i cili nuk ka qenë fare i regjistruar si votues jashtë vendit, të dërgojë fletëvotime me postë dhe në këtë rast fletëvotimi i tij refuzohet”, thotë Elezi.
Sa i përket votave të personave me nevoja të veçanta, Elezi thotë se numri i personave të regjistruar për të votuar përmes ekipeve lëvizëse ka qenë 2.785 persona, por nuk dihet saktë se sa prej tyre kanë shfrytëzuar të drejtën për të votuar.
Po ashtu, sipas tij, edhe numri i votave me kusht nuk dihet saktë deri në mbledhjen e materialit në Qendrën e Numërimit të KQZ-së.
Bazuar në rezultatin e deritashëm të Komisionit Qendror të Zgjedhjeve, Lëvizja Vetëvendosja rezulton fituese e zgjedhjeve të parakohshme parlamentare të 6 tetorit.
Zgjedhjet u zhvilluan në 38 komuna në 895 qendra të votimit me 2,547 vendvotime. Nga 25 subjekte politike garuan 1,067 kandidatë për deputetë. Në zgjedhje morën pjesë 44 për qind e qytetarëve me të drejtë vote, ndërsa u arrestuan 29 persona për shkelje gjatë procesit zgjedhor.
Zgjedhjet e parakohshme parlamentare erdhën pas dorëheqjes së Ramush Haradinajt nga posti i kryeministrit të Kosovës, pas ftesës nga Gjykata Speciale në Hagë për intervistim. Pas shpërbërjes së Kuvendit në gusht, Presidenti i Kosovës, shpalli zgjedhjet për datën 6 tetor./ Opinion.al
