Gazetarja Gerta Zaimi, në lidhje të drejtpërdrejtë për “Klan News”, ka analizuar rezultatet e deritanishme nga numërimi i vullnetit të qytetarëve për zgjedhjen e qeverisë së re për 4 vitet e ardhshme.
Teksa kujtojmë se Partia Socialiste deri më tani po mbizotëron, ndërsa Partia Demokratike vjen në radhë të dytë, për Zaimin është paksa i habitshëm. Kritika pati dhe për demokratët.
Sipas gazetares, Partia Demokratike “duhet të kthejë faqen”, duke nënkuptuar kështu se brenda forcës politike është i nevojshëm aplikimi i reformave. Ajo shprehet se PD-ja duhet të ketë dikë tjetër në krye të saj, jo më Sali Berishën, në mënyrë që të ketë një frymë të re. Në këtë mënyrë mund të ketë e një pëlqyeshmëri më të madhe të qytetarëve ndaj saj.
Hapësirë për surprizë lë ecuria e demokrates Jorida Tabaku në këto zgjedhje për gazetaren, por pritet për t’u parë më tej duke marrë parasysh rezultatet e deritanishme. Zaimi shprehet se PS po fiton deri tani në mënyrë të paparashikuar, e se mund të ndodhë që Partia Social-Demokrate të radhitet e treta në këto zgjedhje, por gjithçka pritet për t’u parë në orët në vijim.
“Lajmi i parë është që PS fiton në mënyrë të paparashikuar. Lajmi i dytë është që del Tom Toshi partia e tretë. Këto të dyja janë lajmet e para që do jepja. Nëse do jepja një lajm të tretë, partitë e vogla marrin më pak se sa pritej.
Gjëja që më habit pak është dhe ecuria e Jorida Tabakut në fakt në këtë situatë, e mendoja shumë më mirë. Megjithatë duhet parë nuk dua të bëj komente të parakohshme.
Ajo që mund të themi për PD është se PD duhet të kthejë faqen. Nëse bëjmë analizën reale të gjëse, është se PD duhet të kthejë një faqe, e një faqe shumë të madhe. Duhet të reflektojë për të krijuar një lloj frymëzimi, një lloj energjie brenda të djathtëve, gjë që duhet bërë rishikimi nga kreu i saj. Unë nuk e kam me zotin Sali Berisha, në kuptimin që ta kem në mënyrë personale, por më duket që zoti Sali Berisha është problemi kryesor, kyç, i asaj që është fryma, baza, situata që PD është në këto momente”, tha ajo.
Lidhur me pjesëmarrjen relativisht jo shumë të lartë të qytetarëve në këto zgjedhje, për gazetaren ishte deri diku e pritshme.
