Mbrëmjen e të enjtes shpërtheu një “bombë” në sistemin e drejtësisë në vendin tonë. Kryetari i Gjykatës së Gjirokastrës u regjistruar teksa i kërkonte favore seksuale një gruaje që kishte probleme pronësie me familjen e ish burrit. Ky rast riktheu edhe një herë në vëmendje të opinionit publik se në çfarë niveli ka arritur drejtësia në Shqipëri.
Ndjekësve të “Opinion.al” ju drejtua një sondazh i ri lidhur me temën e korrupsionit në gjykata.
Në sistemin e drejtësisë keni hasur më shpesh korrupsion përmes:
- Kërkesës së parave
- Favoreve seksuale
- Influencës politike
- Lidhjeve miqësore/familjare
- Të tjera
Kjo ishte pyetja në të cilën publiku ka treguar një interes të veçantë, gjë e cila është reflektuar përmes numrit të lartë të votave.
Në krye të votave të publikut me gati 82% është “kërkesa e parave”. Ajo që përflitet rëndom lartë e poshtë, është e vërtete. Të drejtën e gjen ai që ka më shumë para për të korruptuar gjykatësit. Por çfarë ndodh me ata që nuk kanë para mjaftueshëm për ti dhënë gjykatësve? Atyre u shkelet e drejta nga ata që supozohet se paguhen për të rivendosur të drejtat e cënuara nga persona të tjerë.
Në vend të dytë dhe të tretë nga votat e ndjekësve të “opinion.al” vijnë “Influenca politike” dhe “lidhjet miqësorë ose familjare”, respektivisht me 6.3% dhe 5.4%.
Nga sa u tha më lartë arrijmë në përfundim se në një vend të varfër si vendi ynë nevoja për para është shumë e madhe edhe në klasën e atyre që kanë profesione nga më të paguarat. Në këtë pikë nuk po interesohet më njeri as për influencën politik, ndërkohë që “miku” nuk pi më ujë.
