Rezarta Shkurta emocionohet dhe nuk flet dot gjatë kur pyetet për Ermalin. E ftuar në Pasdite në Top Channel ajo ka rrëfyer marrëdhënien me të, tashmë larg njëri-tjetrit.
“Kur ndodhi ngjarja, atë kohë isha shumë e dehur, e mpirë, e hutuar për ta kuptuar çfarë po ndodh. Ne kishim vajzën 1 vjeçe. Ishim në kulmin e lumturisë. Ishte shumë e vështirë është pak ta thuash…” tha ajo e përlotur në bisedë me Jonida Shehun.
E pikërisht pika e tyre më e dobët, duket se është njeriu që u jep më shumë forcë, si Rezartës dhe Ermalit; është vajza e tyre Hera.
“Personi që na jep kurajo të dyve është vajza jonë Hera. Nuk e di nëse ajo ka arritur ta kuptojë nocionin baba! Edhe ajo ditët e para kur ndodhi ngjarja as nuk hante, as nuk flinte mirë”, tregoi e Rezarta në Pasdite në Top Channel.
E ka të pamundur të flasë gjatë pasi lotët nuk e lënë të komentojë ditët e Herës pa babain, takimet e Rezartës me bashkëshortin dhe surprizat e ditëlindjeve. E sigurtë që ai po e ndjek intervistën e saj i thotë publikisht “Te dua”.
Nuk lë pa komentuar marrëdhënien e saj me vjehrrën, duke treguar se e ndihmon me vajzën dhe se kanë një raport shumë të mirë.
Rezarta Shkurta flet edhe për raportet me miqtë, artistët dhe karrierën si këngëtare. Flet për herë të parë edhe përse nuk e ndjek në Instagram mikeshën e saj Zajminë.
“Në fakt nuk e kam ndjekur kurrë. E kam Instagramin për biznes dhe ndjek vetëm ato. Nuk ka ndonjë hatërmbetje për këtë gjë”, sqaroi Rezarta.
Sa për miqtë, duket se nuk ka shumë. Përmend Elgit Dodën dhe konfirmon lidhjen e tij me Klea Hutën.
“E kam uruar para një viti kur e mora vesh”, tha ajo./Top Channel.
