“Ndërsa pjesa më e madhe e botës po lëviz për të reduktuar përdorimin e lëndëve djegëse fosile, ndotja në vendet e Ballkanit Perëndimor mbetet e lartë për shkak të ngrohjes së shtëpive, impianteve të vjetëruara të qymyrit, makinave të vjetra dhe mungesës së parave për të trajtuar problemin.”
Kështu shkruan media prestigjioze “Reuters”, në një artikull kushtuar ndotjes në Ballkanin Perëndimor.
Teksa trajton një histori personale të një shtetasi në Kosovë që humbi jetën nga kanceri i mushkërive dhe problemeve me rrugët e frymëmarrjes, “Reuters” shkruan se qytetet e vogla si kryeqyteti i Serbisë, Beogradi dhe ai i Bosnjes, Sarajeva, shpesh kanë kryesuar listat e ndotjes globale sipas faqeve që ndjekin cilësinë e ajrit në mbarë botën.
Kjo gjë ka ndikime të kushtueshme shëndetësore dhe gjithashtu mund të rrezikojë perspektivat e vendeve të tilla për t’u bashkuar me Bashkimin Evropian, i cili ka standarde më të rrepta të emetimeve.
Në BE, emetimet neto të gazeve serrë kanë rënë me rreth 40% që nga viti 1990, të nxitura nga përqafimi i energjisë së rinovueshme, tha një raport i Komisionit Evropian në nëntor.
Vendet e Ballkanit Perëndimor janë zotuar të reduktojnë emetimet e karbonit, por vështirësitë ekonomike kanë ngadalësuar progresin.
Kosova, një nga vendet më të varfra të Evropës, gjeneron më shumë se 90% të energjisë së saj nga qymyri. Banka Botërore vlerëson se një kalim në një ekonomi pa qymyr do të kushtojë 4.5 miliardë euro.
Ndikimi i ndotjes është i qartë në të gjithë rajonin, veçanërisht në dimër.
Cilësia e ajrit të kryeqytetit boshnjak u klasifikua si “i rrezikshëm”, më i keqi në botë, sipas IQAir, i cili gjurmon nivelet e ndotjes.
Në kryeqytetin e Maqedonisë së Veriut, Shkupin, vendasit që mbajnë maska shpesh humbasin nga sytë malet e afërta të mbuluara me borë për ditë të tëra.
Shkalla e vdekjeve që i atribuohet ndotjes së ambientit është relativisht e lartë – 114 për 100,000 njerëz në Bosnje dhe rreth 100 në Serbi dhe Mal të Zi, tregojnë të dhënat e Organizatës Botërore të Shëndetësisë, krahasuar me vetëm 45 në Gjermani dhe 29 në Francë.
Ministria e Energjisë e Kosovës i tha Reuters se ishte e angazhuar për reduktimin e emetimeve dhe po investonte në projektet e energjisë së rinovueshme dhe përmirësimin e termocentraleve ekzistuese./Opinion.al
