Tre persona të tjerë janë arrestuar nga policia e Korçës në kuadër të operacionit “Restart”, të nisur 3 muaj më parë.
Në një njoftim për mediat policia ben me dije se janë vënë në pranga, Ertin Hoxhalli 35 vjeç i cili aktualisht ishte në shërbim prove, Kastriot Hoxha 42 vjeç dhe Zarif Beqiri 53 vjeç.
Gjatë aksionit të zhvilluar në fshatrat e njësive administrative Pojan dhe Maliq u sekuestruan 70 kilogramë kanabis të tjera, duke e çuar në 322 kg, sasinë e lëndës narkotike të sekuestruar.
Gjatë kontrollit të ushtruar në banesën e Ertin Hoxhallit forcat e policisë gjetën dy pako me lëndë të dyshuar narkotike kanabis me peshë 1.5 kg dhe 1 peshore elektronike.
Në banesën e Kastriot Hoxhës u gjet 1 armë zjarri automatik me një krehër të vendosur në folenë e tij, me 9 fishekë pa leje, si edhe në banesën e Zarif Beqirit janë gjetur 126 pako me lëndë të dyshuar narkotike kanabis me peshë totale 70 kg, të cilat u sekuestruan në cilësinë e provës materiale.
Ka shkuar kështu në 10 numri i të ndaluarve në kuadër të këtij operacioni, për goditjen e një grupi kriminal në fushën e trafikimit të lëndëve narkotike në drejtim të shtetit grek, shpërndarjes së lëndëve narkotike dhe armëmbajtjes pa leje.
