Institucionet e drejtësisë duhet të punojnë në harmoni dhe respekt ndaj njëra-tjetrës. Kështu është shprehur kreu i SPAK, Altin Dumani, i cili komentoi sot ndikimin që vendimet e Gjykatës Kushtetuese kanë mbi hetimet e Prokurorisë së Posaçme.
Dumani u shpreh se : “Ne nuk diskutojmë vendimet e Kushtetueses. I zbatojmë dhe i respektojmë ato.” Më tej ai shtoi se “SPAK do të mirëpresë arsyetimin e detajuar të gjykatës dhe, nëse është e nevojshme, do të nxjerrë mendime mbi to”.
Në lidhje me çështjen Gëllçi, Dumani theksoi se ekziston një mangësi në koordinimin institucional.
Sipas Dumanit, në vendimin e Strasburgut ka pasaktësi, përfshirë pretendimin se Gëllçi është dorëzuar, ndërkohë që ai është lokalizuar dhe arrestuar.
“Avokatura e Shtetit nuk na vuri në dijeni për rastin “Gëllçi” në Strasburg. Ka pasur një mungesë të theksuar koordinimi, duke na ulur mundësinë për të mbrojtur vendimmarrjet tona. Kanë shkuar të dhëna të pasakta. Thoma Gëllçi është arrestuar, ndërkohë që në Strasburg është dërguar informacion sikur është vetëdorëzuar”, tha Dumani.
Kreu i SPAK përfundoi duke theksuar nevojën për një koordinim më të mirë mes institucioneve për të garantuar funksionimin efikas të drejtësisë dhe respektimin e vendimeve gjyqësore.
