Reshjet e dëborës që përfshinë juglindjen e vendit mbrëmjen e djeshme tashmë kanë ndalur.
Me intensitet deri mesatar kanë qenë më të dendura në lartësitë mbi 1200 m. Raportohet se në fshatin turistik të Dardhës dëbora shkoi deri në 7 cm, ndërkohë që është punuar për pastrim dhe kriposje edhe në akset nacionale që u përfshinë nga reshjet, borëpastrueset kanë qenë në terren në akset Korçë-Pogradec, Pogradec-Qafëthanë dhe në aksin Korçë-Erseke në Qafën e Qarrit.
Sakaq, në segmentin rrugor Korçë-Panarit trashësia e dëborës raportohet se ka shkuar deri në 4 cm, ndërsa reshjet kanë qenë me intensitet të ulët.
Mësohet se nuk ka pasur probleme me qarkullimin e automjeteve, por për drejtuesit e mjeteve apelohet që të qarkullojnë me zinxhirë dhe te tregojnë kujdes të shtuar.
Gjithashtu në rrugën Lekas-Voskopojë dëbora ka shkuar në 3 cm, edhe në këtë segment nuk ka probleme.
Të gjitha akset nacionale dhe rrugët dytësore janë të kalueshme dhe pa probleme, ndërkohë temperaturat priten të ngrihen mesditën e sotme.
