Pas ditëve me temperatura që prekën 40 gradë, Italia veriore është përfshirë nga një valë stuhish të fuqishme.
Të dielën pasdite, rreth orës 17:00, Milano dhe zonat përreth u goditën nga reshje të dendura, erëra të forta dhe breshër, duke shkaktuar përmbytje, rrëzim pemësh dhe dëme të shumta materiale.
Një grua 63-vjeçare humbi jetën në Robecchetto con Induno, pasi u shtyp nga një pemë e rrëzuar gjatë stuhisë.
Dy persona të tjerë mbetën të plagosur. Mbrojtja Civile shpalli alarm portokalli për rajonin e Lombardisë, ndërsa u mbyllën parqet në Milano dhe Parku i Monza-s.
Në total, zjarrfikësit kanë ndërhyrë qindra herë për përmbytje, rrëzime pemësh dhe dëmtime infrastrukturore. Në Bergamo, 13 fluturime u devijuan drejt aeroporteve të tjerë për shkak të motit.
Ndërkohë, autoritetet paralajmërojnë se pas rënies së temperaturave me 7–8 gradë, mund të rikthehen sërish valët e të nxehtit në ditët në vijim.
