Kanë mjaftuar 30 minuta shi për të shkaktuar situatë kaotike në disa prej akseve të njohura për përmbytje në qytetin e Durrësit. Vetëm pak minuta më parë shira të vrullshëm mbushën rrugët e qytetit të Durrësit me ujë duke shkaktuar vështirësi në lëvizje.
Ndër akset kryesore të bllokuara janë ato të zonës së Currilave, zona pranë stadiumit dhe rreth-rrotullimi pranë Portit të Durrësit. Situata është duke u normalizuar dhe ujërat po tërhiqen nga kolektorët e vendosur në punë për të zhbllokuar akset problematike.
Edhe qyteti i Lushnjes është përballur me stuhie ere dhe përmbytje gjatë ditës së sotme. Stuhia ka bërë që rrugët në qytet të përmbyten duke e bërë më të vështirë kalimin.
Pas gjithë kësaj situtate të raportuar nuk ka asnjë person të lënduar apo përmbytje të familjeve. Stuhia ka zgjatur rreth 20 minuta, duke përmbytur vetëm rrugët e qytetit, kjo ka bërë edhe më të vështirë lëvizjen e qytetarëve. Pamjet e siguruara nga Tv Klan tregojnë atë çfarë ka lënë pas kjo stuhi.
Përmbytje të rrugëve ka patur edhe në Laç për shkak të reshjeve të shiut. Intensiteti i lartë i reshjeve të shiut këtë pasdite ka bërë që rrugët kryesore të qytetit të Laçit të përmbyten. Përroi që përshkon qendrën e qytetit doli nga shtrati, por pa shkaktuar dëme në biznese apo banesa.
