Një media franceze ka realizuar një reportazh në lidhje me rrezikun që ka në Shqipëri zhdukja e shqiponjave. Ky shpend ndër të tjera konsiderohet edhe si simbol kombëtar i Shqipërisë, kështu gjuetia ndaj tyre është e ndaluar me ligj. Por pavarësisht këtij ligji shqiponjat jo vetëm që gjuhen por kanë edhe tregun e tyre të shitjes ku një e tillë kushton jo më shumë se 85 euro.
Pavarësisht se është një shpend i mbrojtur, gjuetia ndaj shqiponjave nuk njeh të ndaluar. Eksperti Mirjan Topi thotë se numri i këtyre shpendëve është reduktuar në mënyrë alarmante. Ai thotë se 25 vjet më parë ishin rreth 200 çifte shqiponjash të arta, por tani kanë mbetur diçka më pak se gjysma.
Një pronar lokali në Orikum thotë me krenari se ka blerë një shqiponjë për 400 euro dhe e ka vendosur në krah të flamurit. Shumica e shqiponjave vendosen nëpër lokale e restorante. Shqipëria ka vendosur një moratorium gjuetie në vitin 2014, për të ndaluar së paku 3 mijë gjahtarë italianë, që kanë vrarë në Shqipëri mbi 150 mijë zogj. Por efiçenca e këtij moratoriumi mbetet e limituar, shkruan agjencia.
