Elena Lika
Në fshatin Thanasaj të Komunës Dushk në Lushnje, jeton në varfëri të tejskajshme familja e Dritan Bicakut. Për shkak të problemeve shëndetesore të shumta, askush në këtë familje nuk është vlerësuar si i aftë për punësim. Për 7 anëtarët e familjes Bicaku, ushqimi dhe nevojat e tjera bazike sigurohen me të ardhura minimale.
Nënë Qamilja është rreth të 60-ave, por për shkak të jetës së vështirë dhe sëmundjeve, duket sikur mban mbi shpinë shumë më shumë vite. Ajo e ka humbur shikimin 7 vite më parë, menjëherë pas vdekjes së bashkëshortit. Nënë Qamilja dëshiron shumë t’i kthehet shikimi një ditë, por dëshira e saj më e madhe nuk është kjo. Edhe pse në gjendje aspak të mirë shëndetsore, nënë Qamilja thotë se për të, është më e rëndësishme shëndeti i djalit të saj Dritanit, dhe nipit Gafurr.
Dritani është 33 vjeç. Si kryefamiljar, ai ndjen përgjegjësinë t’i sigurojë familjes të tij të paktën minimumin e nevojshëm, por në vend të një vendi pune, ai përballet me paragjykime. Dritani gjithashtu vuan nga një sërë sëmundjesh që prekin aparatin tretës, megjithatë ai vazhdimisht është përpjekur të gjejë një punë. Askush nuk e punësonte Dritanin për shkak të shtait të tij, deri natën e mbrëmshme ku në numrin e lënë në dispozicion për ndihma nga Opinion, erdhi një mesazh nga Kryetari i Bashkisë së Rrogozhinës për të punësuar Dritanin.
Behije Bicaku është 38 vjeç. Ajo vuan nga disa shqetësime të shëndetit mendor, dhe të qenurit nënë e 4 fëmijëve, ia ka bërë edhe asaj të pamundur punësimin. Behija i është përkushtuar tërësisht rritjes së fëmijëve, sidomos Gafurrit, djalit 1 vjeçar i cili është gjithashtu i sëmurë.
Nga të dy prindërit e Behijes jeton vetëm nëna, por ajo ka edhe 4 motra dhe 3 vëllezër të tjerë në Durrës. Edhe pse ka një familje të madhe, duket se ata e kanë lënë në harresë motrën e tyre të cilët Dritani, i justifikon me faktin që “kanë edhe ata problemet e veta si cdo familje”.
Kur mbërritëm në shtëpinë e familjes Bicaku, të parat që na pritën ishin tre vajzat: Selda, Esmeralda dhe Anxhela. Edhe pse të veshura keq dhe gjithë drojë, buzëqeshja në fytyrë dhe shkëlqimi në sy nuk u mungonte.
Selda është 8 vjeç, Esmeralda sapo ka mbushur 6, ndërsa Anxhela është 4 vjec. Selda është e vetmja nga vajzat që shkon në shkollë. Ëndrra e saj, në ndryshim nga bashkëmoshatarët, është mjaft modeste. Kur të rritet, Selda dëshiron të bëhet shitëse.
Edhe pse është familja më e varfër në fshatin Thanasaj, Seldës sërish i duhet t’i blejë librat. Njësoj si prindërit e tyre, edhe tre vajzat duan një shtëpi ku të mund të jetojnë më mirë, ose sipas fjalëve të Seldës: “një shtëpi të bukur e të ngrohtë”.
Familja Bicaku jeton me vetëm 23000 leke në muaj, para këto që vijnë nga pensioni i nënë Qamiles dhe asistenca që merr Dritani dhe e shoqja Behije të mbledhura bashkë .
Cdo ditë në familjen Bicaku është një luftë e vazhdueshme për mbijetesë; një luftë për të vendosur ushqim në tavolinë për 4 fëmijët, një luftë për të siguruar ilace për nënë Qamilen, dhe një luftë e Dritanit dhe Behijes me paragjykimet nga banorë të tjerë të fshatit. Kësaj familjeje i mungojnë shumë gjëra, por për të gjithë ata më e rëndësishmja është që banesa e tyre të bëhet më e jetueshme, që netët e ftohta të dimrit të përballohen më lehtë. Banesa e familjes Bicaku është një shtepi përdhese 90m2, së bashku me truallin që e rrethon.
Problemi kryesor është mungesa e ujit të pijshëm, të cilin vetë nënë Qamilja e mban mbi supe me kova dhe e sjell në shtëpi. Familja Bicaku jeton në një shtëpi ku dyshemeja është e pashtruar, dhe në dimër, i gjithë shiu dhe i ftohti hyjnë brenda për shkak të mureve dhe çatisë së dobët. Në ato momente, i vetmi ngushëllim duket se është një sobë me drru që mbledh të gjithë familjen rreth saj.
Në fshatin Thanasaj qendra shëndetsore hapet vetëm një orë në javë. Dritanit i duhet të ecë një orë deri në Cermë për të blerë ilaçe. Në raste urgjencash shëndetsore, ata duhet të lajmërojnë një taksi që t’i çojë në spitalin e Lushnjës.
Natën e mbrëmshme gjatë transmetimit live të emisionit Opinion, erdhën një pafundësi mesazhesh që ofronin ndihma për këtë familje. Oriela Cano, drejtore e PR dhe Marketingut në Spitalin Amerikan, tha se spitali do t’i ofrojë të gjithë familjes shërmbimim mjeksor që u nevojitet: një vizitë për sytë e nënë Qamiles, kujdesi për katër fëmijët dhe full check up për Dritanin dhe Behijen. Dhe në fakt, kjo nuk është hera e parë që ky spital përfshihet në nisma të tilla sociale.
Forma të tjera ndihmash u ofruan gjithashtu të cilat do të menaxhohen nga Fundjavë Ndryshe.
