TIRANE- Progres raporti i BE nuk ka qenë vetëm pjesë e debateve në nivelet e larta të politikës. Janë përfshirë në debat edhe djali i ish-Kryeministrit, Sali Berisha, Shkëlzeni me deputetin e ri të PS, Eduard Ndocaj që njihet si “kaubojsi”.
Shkëlzeni është bërë disa herë protagonist në media për shkak të disa postimeve që bën në Facebook kundër Edi Ramës. Kësaj radhe foli për progres-raportin ku përmes një foto-montazhi rreshtoi Ramën dhe disa deputetëve mes tyre edhe Eduard Ndocaj. “Shqiperia nuk mund te integrohet ne BE kur ne parlamentin e saj ka vrases, tutore, trafikante”, shkruan Shkëlzen Berisha. Ka reaguar deputeti i Lezhës, duke shkruar në Fb: “Para se Shkëlzeni të tentojë të merret me mua padrejtëisht, pa më njohur dhe para se të më fusë në një thes që nuk më takon, do i këshilloja të mësoje ccfarë është puna se akoma nuk i ka thënë kush puna e mbarë!” Por djali i Berishës ka replikuar sërish duke shkruar: “Eduart Ndocaj më ka keqkuptuar. Në foto ai nuk vjen si pjese “grupit” të Rames por si pjesë e flamurit të BE”.
