Opozitën në parlament prej tre javësh e bën Libra. Sot sërish Mimoza Hafizi dhe Ben Blushi kanë debatuar me deputetët e PS për reformën në drejtësi dhe ligjet e Vetingut.
Përplasja më e pashpër ishte Blushi-Balla. Në një moment n/kryetari i grupit të PS del nga formati zyrtar dhe i drejtohet Blushit: Më vrafshin mua nëse e ke lexuar ti reformën në drejtësi.
“Ke gjithë këto vite deputet dhe asgjë nuk ke lexuar për ligjet. Më vrafshin mua nëse ke lexuar gjë për Reformën në Drejtësi. Se një gjë di ta bësh mirë ti, të pish kafe me Shkullakun e Bushatin dhe bisedat që bën me ta”, u shpreh Balla.
Më herët Ben Blushi akuzoi PS-në se ka bllokuar me qëllim ngritjen e komisoneve për Vetingun.
“Reforma në Drejtësi është bllokuar me një vendim nul. Të ndryshoni rendin e gjërave. Bëni ç’është e mundur që të kete zgjedhje të besueshme. Për ju nuk më vjen keq por për Shqipërinë po. Shkatërrim të mbarë por Shqipëria nuk e meriton këtë çmim” u shpreh Blushi.
Më tej deputeti i LIBRA ironizoi dhe deklaratat e disa ministrave mbi Vetingun.
“Dalin disa ministra dhe thonë se pas procesit të Vettingut, do të ndryshojë modeli i këpucëve, do të rritet numri i bletëve në Dibër apo do të ndryshojë çmimi i arrës në Tropojë. Jo të nderuar. Vettingu ka për qëllim që të fusë disa ish-ministra, ish-kryebashkiake apo qeveritarë vrasës në burg. Kaq e thjeshtë është”, u shpreh themeluesi i Libra-s. /Opinion.al
