Presidenti i SHBA-së, Donald Trump u bëri thirrje amerikanëve që të jenë “të fortë, të guximshëm dhe të durueshëm”, pak minuta përpara se bursa e Nju Jorkut të hapej me parashikime për rënie të mëtejshme.
“Shtetet e Bashkuara kanë një shans për të bërë diçka që duhet të ishte bërë dekada më parë”, tha Trump duke iu referuar reformave të tij tarifore që kanë përmbysur ekonominë globale.
Më tej ai shton “Mos u trego i dobët! Mos u bëj budalla!… Ji i fortë, i guximshëm dhe i durueshëm, dhe rezultati do të jetë i shkëlqyer!“
Tarifat e vendosura nga Presidenti Donald Trump kanë shkaktuar një tronditje të konsiderueshme në tregjet globale.
Taksa bazë prej 10% mbi të gjitha importet dhe tarifat e larta për partnerët kryesorë tregtarë si Kina, Bashkimi Evropian dhe Japonia, kanë ndikuar ndjeshëm në tregjet financiare të cilët kanë vijuar rënien edhe gjatë fundjavës. Rënia në bursat amerikane raportohet me gati 6 % duke rezultuar në një humbje tregu prej rreth 6.6 trilionë dollarësh.
Në Evropë, bursa në Mbretërinë e Bashkuar ra me 6%, duke arritur nivelin më të ulët të një viti, ndërsa ajo e Gjermanisë dhe e Francës pësuan rënie përkatësisht prej 10% dhe 6.6%. Rënie ka pësuar edhe indeksi Nikei i Japonisë me pothuajse 9%, ndërsa tregjet në Tajvan dhe vende të tjera aziatike pësuan gjithashtu humbje të mëdha.
Sektorët më të prekur deri tani janë teknologjia dhe industria e makinave. Aksionet e kompanive më të mëdha Tesla dhe Apple kanë pësuar rënie të ndjeshme, ndërsa kompania e automjeteve Jaguar Land Rover ka njoftyuar pezullimin e dërgesave në SHBA. Ministrat europianë mblidhen këtë të hënë në Luxemburg për të shqyrtuar një përgjigje konkrete ndaj Uashingtonit, ndërsa vendet anëtare nuk qëndrojnë në një mendje.
Italia apo Spanja janë ndër vendet më të kujdesshme dhe të gatshme për të shmangur një përshkallëzim të mëtejshëm. Nga ana tjetër, Franca kryeson grupin më të ashpër, pas një thirrje të nënkuptuar nga investitorëve francezë për të pezulluar punën e tyre në SHBA si pjesë e reagimit.
