Fitorja 5-0 e arritur kundër Celta Vigo-s në kampionat i ka bërë mirë moralit të Barcelona-s në prag të përballjes delikate për ndeshjen e kthimit të 1/8-ve të Champions League kundër Paris Saint-Germain. Të mërkurën, më 8 mars, katalanasit do të presin kampionët e Francës, me një objektiv të vetëm: realizimin e një përmbysjeje që do të ishte historike, duke parë se ndeshja e parë është fituar 4-0 nga PSG. Për këtë arsye, në shtëpinë e Barçës, kanë studiuar një plan për ta kthyer “Camp Nou” në një ferr të vërtetë për miqtë, me shpresën për t’i dhënë një shtysë më shumë lojtarëve të Luis Enrique, i cili ka lajmëruar se do të largohet në fundin e këtij sezoni, për të realizuar një arritje që do të mbahej mend për një kohë të gjatë.
Gjithçka do të fillojë nga koreografia e publikut, që do ta transformojë stadiumin në një ferr “blaugrana”. Përballë tribunës do të shpaloset një banderolë gjigante 45×46 metra, që përveç ngjyrave të skuadrës dhe stemës, do të ketë edhe shkrimin “Tots amb L’Equip”, ose më saktë “Të gjithë me skuadrën” për të evidentuar unitetin e ambientit, gati të kërkojë “remuntada”-n kundër Paris Saint-German, që ka një avantazh të madh. Do të jetë një banderolë gjigante si ajo e shfaqur me rastin e lamtumirës së Xavi-t, ose siç ka ndodhur për festimin e “Topit të Artë” të fituar nga Messi. Ndër të tjera, të gjithë të pranishmëve do t’u jepet një flamur me ngjyrat e Barcelona-s, për një total prej 80.000 copësh, nëpërmjet të cilave do të krijohet mozaiku që do të ngjyrosë “Camp Nou”. Një atmosferë e jashtëzakonshme për një ndeshje që duhet të jetë spektakolare.
