Zlatan Ibrahimovic nuk do t’ia dijë për rekordet e përgjithshme, sepse e ka mendjen vetëm te vetja dhe skuadra e tij, Manchester United, e cila sot fitoi 3-1 ndaj Swansea City-t. I pyetur nëse kishte dijeni se me rrjetën e tij të parë (të dygolëshit personal) shënoi golin e 25000-të në historinë e kampionatit anglez, ai u përgjigj me shaka duke thënë se kishte menduar se kjo shifër ishte e tija. Ibrahimovic gjithsej ka shënuar 400 gola në karrierën e tij dhe këtë jubile ai e arriti me golin e tij të dytë në “Liberty Stadium“, por u duk qartë se për historinë nuk është edhe aq i interesuar.
Ah, jo, nuk e dija atë rekord“, – tha sulmuesi i “Djajve të kuq” në “BBC Sport“. “Mendova se vetëm unë kam shënuar 25 mijë gola”, – shtoi ai duke qeshur. Ish-lojtari i PSG-së nuk kishte shënuar në Premier League që në derbin e Manchester-it më 10 shtator, por ai theksoi se kurrë nuk e humbi besimin te vetja. “Jo, për aq kohë sa krijon shanse, gjë që unë e kam bërë prej javësh, e di se golat do të vijnë. Por gjëja më e rëndësishme është të fitosh. Golat pastaj do të vijnë”, – shpjegoi 35-vjeçari, i cili në fund shtoi se iu duk pa shkak kartoni i verdhë që mori, por ishte shumë i lodhur të dëgjonte se çfarë i tha gjyqtari.
