Aplikimet në skemën Grant 2024 arrijnë në shifra rekord, duke regjistruar plot 539 kërkesa për financim të paraqitura jo vetëm nga sipërmarrësit e rinj, por edhe nga individë që kanë një ide inovatore për të bërë biznes në vendin tonë.
Lidhur me numrin e lartë të aplikimeve, Ministrja e Shtetit për Sipërmarrjen dhe Klimën e Biznesit, Delina Ibrahimaj thotë se kjo tregon besimin e fortë që sipërmarrësit e rinj kanë në potencialin e skemës së paraqitur nga qeveria shqiptare për financimin dhe zhvillimin e startup-eve të tyre. Ditën e nesërme pritet të nisë edhe procesi i vlerësimit sipas fazave të përcaktuara.
“Shpreh mirënjohjen për të gjithë 539 aplikantët që kanë treguar besim ndaj skemës GRANT 2024 të financuar nga qeveria Shqiptare. Përkushtimi juaj i palëkundur ndaj përparimit të sipërmarrjes është vërtet i lavdërueshëm
Faza tjetër e rëndësishme përfshin procesin e vlerësimit. Ky proces është krijuar për të vlerësuar meritën, qëndrueshmërinë dhe ndikimin e mundshëm të secilit projekt. Qëllimi ynë nuk është vetëm të shpërblejmë pjesëmarrjen, por të nxisim një ekosistem ku idetë dhe startup-et transformuese mund të rriten dhe të bëjnë një ndryshim të qëndrueshëm.
Fondi prej 300 milionë lekësh i akorduar nga qeveria për thirrjen e këtij viti, do të ndihmojë në mbështetjen e individëve dhe startup-eve në sektorë të ndryshëm, duke u fokusuar në fushat prioritare të përcaktuara në Strategjinë e Specializimit Inteligjent të Shqipërisë (S3), siç janë: ICT, Prodhim, Energji, BPO, Agrobiznes, dhe Turizëm.
Ky fond paraqet një mundësi të jashtëzakonshme për të mbështetur biznese të reja inovative në fazën e tyre fillestare, deri në atë të rritjes dhe ndërkombëtarizimit. Thirrja mbështet startup-et në tre faza, duke ofruar financim për ide inovative deri në 1.5 milionë lekë, zhvillimin e biznesit në një fazë të dytë deri në 4.5 milionë lekë, si dhe në rritjen dhe ndërkombëtarizimin e sipërmarrjeve ekzistuese, të cilat do të financohen deri në 9 milionë lekë.
