Presidenti Ilir Meta ka bërë edhe njëherë thirrje për zbatimin e rekomandimeve të Komisionit të Venecias lidhur me Gjykatën e Lartë dhe Kushtetuese.
Në një status në Facebook, Meta ka ndarë një intervistë të anëtares së Komisionit, Prof. Angelika Nussberger, dhënë për Deutche Ëelle ku ajo thotë se opinioni i Komisionit “nuk ka vend për interpretime”.
“Po, nuk ka më vend për interpretime! tani është koha për zbatimin korrekt të rekomandimeve të Komisionit të Venecias, përmes bashkëpunimit transparent dhe konstruktiv.”- shkruan Presidenti Meta që shton se “kjo është e vetmja rrugë drejt çeljes së negociatave dhe funksionimit të shtetit ligjor”.
Në intervistën e saj, Prof. Nußberger thotë se për Shqipërinë ka një rëndësi të jashtëzakonshme të ketë një Gjykatë Kushtetuese funksionale dhe rruga drejt ngritjes së saj duhet të jetë e qartë pas opinionin të Komisionit të Venecias.
Sa i përket opinionit lidhur me emërimet në Gjykatën Kushtetuese që sollën edhe përplasjen Kuvend-Presidencë, juristja gjermane thotë se janë dhënë përgjigjet për pyetjet e kërkuara dhe nuk ka vend për interpretime.
“Opinioni i Komisionit të Venecias jep një përgjigje për pyetjet e kërkuara. Prandaj nuk mund të ketë asnjë dyshim që do të merret seriozisht. Përgjigjet e dhëna përfaqësojnë komunitetin ligjor europian; ato kanë një autoritet të veçantë. Pas dëgjimit të të gjithë aktorëve relevantë, Komisioni i Venecias e shpjegon pozicionin e tij ligjor sa më qartë të jetë e mundur. Kështu që nuk ka vend për interpretime.”- ka thënë Nußberger për DW.
Më 19 qershor, Komisioni i Venecias publikoi opinionin e tij për emërimet kushtetuese duke argumentuar se “sjellja e Presidentit në lidhje me këtë nuk duket se justifikon shkarkimin e tij” nga Kuvendi dhe se “duket e arsyeshme” dekretimi i Marsida Xhaferllarit në Gjykatën Kushtetuese.
Ndër të tjera Venecia shprehej se Këshilli i Emërimeve në Drejtësi “nuk funksionoi në mënyrë transparente” dhe se me dërgimin e listave jo në një kohë tek Presidenti dhe Kuvendi “shkaktoi incidentin e madh procedural”.
Në opinionin e tij, Venecia vuri theksin tek nevoja thelbësore për arritjen “e një konsensusi të gjerë për një dialog konstruktiv, ndërinstitucional dhe bashkëpunimi mes institucioneve të shtetit” për ngritjen e Gjykatës Kushtetuese.
Por ata nënvizuan faktin se për këtë duhet çuar para reforma në Drejtësi e cila sipas tyre dhe Prof. Nußberger duhet të fokusohet në plotësimin e Gjykatës së Lartë.
“Në të ardhmen është i mundur një fillim i ri. Të gjithë aktorët politikë duhet të marrin si pikë startimi nevojën urgjente për të rithemeluar Gjykatën e Lartë. Ky duhet të jetë një qëllim politik i përbashkët, në të cilin nuk duhet të interferojnë interesat personale dhe politiko-partiake.”- tha Nußberger në intervistën e saj. /Opinion.al
