Mbi 86 mijë banorët e Njësisë nr.5 në Tiranë tashmë e marrin shërbimin e kujdesit parësor në standarde bashkëkohore, me rehabilitimin e plotë të Qendrës Shëndetësore nr.8 dhe dy pikave të konsultorit të nënës dhe fëmijës.
“Programet për kujdesin ndaj nënës dhe fëmijës janë në zemër të politikave tona sociale dhe shëndetësore, ndaj po investojmë për ofrimin e një standardi të ri për konsultoret në të gjithë vendin”, u shpreh Ministrja e Shëndetësisë dhe Mbrojtjes Sociale, Ogerta Manastirliu, gjatë vizitës në ambjentet e rikonstruktuara tërësisht në konsultorin e nënës dhe fëmijës në zonën e ish-Bllokut në Tiranë.
Dy pikat e konsultoreve të Qendrës shëndetësore nr. 8 janë pjesë e konsultoreve të nënës dhe fëmijës që po përfundojnë rehabilitimin e plotë këtë vit në të gjithë vendin.
“Me programin e rikonstruksionit të 80 qendrave shëndetësore dhe ambulancave në vend, janë 45 konsultore të nënës dhe fëmijës që janë rehabilituar plotësisht dhe planifikojmë të rikonstruktojmë 90 konsultorë të tjerë me buxhetin e vitit 2019”, tha Manastirliu.
Veç pikave të konsultorit, është rehabilituar tërësisht Qendra Shëndetësore nr. 8 në qendër të Tiranës.
“Në kuadër të programit të rikonstruksionit të 300 qendrave shëndetësore në 4 vite, po investojmë në përmirësimin e kujdesit parësor jo vetëm në infrastrukturë, por edhe në ofrimin e shërbimeve shëndetësore pa burokraci për qytetarët përmes programeve të recetës elektronike dhe referimit elektronik”, u shpreh Ministrja e Shëndetësisë dhe Mbrojtjes Sociale.
Qendra Shëndetësore nr. 8 në Tiranë është rehabilituar plotësisht, në të gjitha ambientet, përfshi edhe rehabilitimin dhe pajisjet e reja në laborator si dhe sistemin e informacionit që shmang sorollatjet e qytetarëve, një sistem që më parë nuk ekzistonte në këtë qendër shëndetësore.
Qendra Shëndetësore nr. 8 në Tiranë është një prej 80 qendrave shëndetësore që përfundojnë rehabilitimin e plotë brenda vitit 2018.
