Rreth 238 banesa të tjera parashikohet të prishen në Tiranë në kuadër të projektit të rehabilitimit të lumit Lana.
Projekti parashikon rehabilitimin e lumit nga ura e shkollës teknologjike deri te kryqëzimi me Unazën e Madhe. Kostoja e miratuar në Komisionin e Veprimtarive Prodhuese është 24 milionë euro për një segment 1.8 kilometra.
Financimi parashikohet të kryhet në masën e 14 milionë euro nga buxheti i bashkisë, 8 milionë euro kredi nga Banka Evropiane e Investimeve, ndërsa 2.4 milionë euro grant i kësaj banke.
Megjithatë kjo nismë nuk kaloi pa diskutime në komision ku disa deputetë kërkuan zgjidhje për 238 banesat që preken nga zbatimi i projektit.
“Neve na ka kushtuar shumë ai projekti i Unazës së Re i cili u përfol edhe si korrupsion. Ata njerëz nuk janë kafshë, kanë ardhur si kanë ardhur dhe është faji i shtetit. I atij shteti që ishte atëherë dhe i këtij shteti që është tani. Shteti duhet të mbajë përgjegjësi për çdo familje aty që edhe neve të mos na fillojë një rezistencë e dytë” tha deputeti i PS, Dritan Bici.
Sipas nënkryetarit të Bashkisë, Arbjan Mazniku, vetëm 25 shtëpi kanë akte pronësie. Kjo do të thotë se 213 banesa do të prishen pa u kompensuar dhe banorët do të trajtohet me 3 programe strehimi.
“Programi i parë është programi i bonusit të qerasë në të cilin ne i japim mundësi familjeve që të kenë një qera 3-vjeçare deri sa të kenë mundësi të rivendosen diku tjetër. Ne do të kemi një program të posaçëm të ndërtimeve të banesës sociale të reja për këto familje dhe më pas programi tjetër është banesa sociale të tjera sociale të cilat Bashkia sot disponon” tha Mazniku.
Shpronësimi për banesat e palegalizuara është i pamundur sipas nënkryetarit të Bashkisë së Tiranës për shkak të pengesave ligjore. Kjo solli ndërhyrjen e disa deputetëve të cilët propozuan miratimin e një ligji të veçantë, që të trajtojë me kompensim çdo familje që preket.
“Hajde bëjmë një nisëm parlamentare, një nisëm të veçantë, për kompensimin e atyre dhe të atyre të Astirit që projekti të vazhdojë” shtoi deputeti Bici. /Opinion.al
