Nis sot regjistrimi në fakultete i maturantëve që fituan të drejtën për të ndjekur studimet në një ose disa degë në universitetet publike apo private. Por më parë ata duhet të kryejnë regjistrimin në rrugë elektronike në portalin e maturës shtetërore, duke futur ID e tyre dhe programin ku janë shpallur fitues.
Më pas, ata duhet të paraqiten në sekretarinë e fakultetit përkatës për të kryer regjistrimin me dokumente. Bëhet fjalë për: dokumentin e identifikimit, fotokopjen e noterizuar të diplomës së maturës bashkë me certifikatën e notave, dy fotografi personale dhe një deklaratë, e cila vërteton që nuk po ndjek një program të dytë studimi, të cilën e gjen në sekretari dhe që përmban edhe firmën e sekretares së fakultetit, raporton panorama.
Ata që kanë fituar në disa degë, por nuk e kanë bërë ende zgjedhjen e tyre, kanë afat deri në datën 20 për regjistrim në shkollë. Nëse nuk e bëjnë, humbasin të drejtën e studimit për raundin e parë të garës. Në dilemë për t’u regjistruar ndodhen më tepër kandidatët që kanë arritur të dalin fitues në raundin e parë, por në një program studimi jo shumë të preferuar.
Gjatë kësaj jave ata duhet të marrin vendim: të vijojnë garën duke mos u regjistruar në këtë fazë apo të bëjnë regjistrimin duke ndjekur një profil që i mban brenda auditorëve të një fakulteti që nuk e kanë me shumë qejf.
Sipas ekspertëve të arsimit, të pakta janë gjasat që në rast se ata vijojnë garën në fazën e dytë të humbasin të drejtën edhe në atë program studimi, por kjo nuk është e sigurt, pasi në këtë fazë futen në garë edhe maturantët e vjeshtës, plot 7 mijë.
Gjithsesi, ata duhet të bëjnë më parë llogaritë e përafërta nëse portofoli i tyre i pikëve i çon ata në një degë më të preferuar. Të shumtë janë maturantët e pakënaqur me sistemin e pranimeve që do të dalin sot në orën 11:00 në një protestë përpara Kryeministrisë.
