Avokati i Popullit thotë se masat e parashikuara nga regjimi ‘41 Bis’ në burgje kanë tejkaluar standartet ndërkombëtare, madje dhe vetë rreptësinë e masave italiane nga ku është huazuar regjimi.
Pas verifikimeve në burgun 313 dhe Peqin, Avokati i Popullit i ka dërguar një shkresë me rekomandime ministres së Drejtësisë dhe drejtorit të Përgjithshëm të Burgjeve për sa i përket regjimit ‘41 Bis’.
Masat që janë marrë ndaj të burgosrve në kuadër të këtij regjimi kanë sjellë reagimin e tyre, me disa që kanë hyrë në grevë urie.
Genci Balla, i dënuar si pjesë e grupit të xhihadistëve që rekrutonte luftëtarë shqiptarë dhe i dërgonte në Siri kërkon ushqim sipas ritit fetar. I ndodhur në regjimin 41Bis në Peqin ai ka refuzuar ushqimin, ndërsa ka kërkuar dhe orare më të zgjatura ajrimi, por edhe pasjen e mjeteve të informimit si televizor apo dhe radio.
Në burgun 313 pas ankesave të dënuarit Emiljano Shullazi Avokati i Popullit ka konstatuar mungesë të kushteve higjieno sanitare në ambjentet e përbashkëta. Sipas inspektorëvenë këtë burg nuk ka një vendim të drejtorit të përgjithshëm për higjenën e ambienteve.
Më shumë se 100 të dënuar në burgun e sigurisë së lartë në Peqin i kanë dërguar disa ditë më parë një letër Presidentit të Republikës Ilir Meta, Kryeministrit Edi Rama, Kryetarit të Kuvendit, Gramoz Ruçit dhe ministres së Drejtësisë, Etilda Gjonaj, ndërsa përmes peticionit kërkojnë amnisti dhe rishikim të dënimeve, pasi sipas tyre kanë qenë dënime maksimale të dhënë nga drejtësia shqiptare. Sipas të dënuarve, fajtor është shteti për çdo vrasje apo krim dhe kërkojnë që dënimet të përgjysmohen dhe të hiqen ato të përjetshmet, duke i konvertuar në 20 vite. Të dënuarit në burgun e Peqinit janë shprehur se nuk tërhiqen nga greva e urisë deri në plotësimin e kërkesave të tyre.
Për problemet e regjimit 41 bis pas ankesave edhe nga disa të dënuar të tjerë Avokati i Popullit inspektoi burgun Jordan Misja dhe atë të Peqinit.
Erinda Ballanca i ka dërguar një shkresë ministries së Drejtësisë Etilda Gjonaj, lidhur me disa nga rekomandimet për 41 bis, por ajo që bie në sy është se sipas Avokatit të Popullit legjislatori shqiptar ka tejkaluar dhe vetë rreptësinë e masave italiane nga ku është huazuar regjimi.
