Kukësi ka marrë fitoren e parë në Kategorinë Superiore falë edhe një super-Reginaldo. Sulmuesi nga Mozambiku ishte autor i të tre golave, në fitoren 3-1 që nënkampionët në fuqi të Shqipërisë arritën përballë Tiranës.
Spektakli i 28 vjeçarit nisi që në minutën e 2-të. Sulmuesi kontrolloi bukur një top të ardhur nga mbrojtja dhe me një sprint “alla-Usain Bolt” iu drejtua portës së Likës për të zbrasur të djathtën e për të dërguar në rrjetë sferën.
Pësimi i golit zgjoi disi skuadrën e Ze Maria por Dejan Blazhevski dhe Maveje nuk arritën të gjenin rrugën e rrjetës. Atë që nuk e bënë bardheblutë, e bëri sërish Reginaldo që në limitet e pjesës së parë shfrytëzoi në maksimum një krosim të Zguro dhe me kokë dyfishoi avantazhin. 2-0 u mbyll pjesa e parë ndërkohë që në fraksionin e dytë, Ze Maria tentoi të ndryshoi gjithçka duke i kryer të tre zëvendësimet duke hedhur në fushë Muçin, Grecën dhe Ofei.
Karta që rezultuan frytdhënëse për Tiranën që ngushtoi rezultatin me anë të Muçit. Megjithatë goli i qetësisë për Kukësin erdhi vetëm pak minuta më pas, ku sërish kishte si protagonist Reginaldon. Sulmuesi i ardhur këtë verë nga Laçi kompletoi “tripletën” e tij të parë me fanellën e Kukësit dhe i dhuroi fitoren e parë verilindorëve në këtë sezon të Kategorisë Superiore.
Pas këtij rezultati Kukësi ngjitet në vendin e 5-të me 4 pikë ndërkohë që Tirana nuk po arrinë të jap maksimumin në elitën e futbollit shqiptar, duke grumbulluar vetëm një pikë në 3 javët e para.
