Ambasada ruse në Shqipëri ka reaguar lidhur me deklaratën e ish-kryeministrit Sali Berisha, i cili ditën e djeshme u shpreh e ka refuzuar “shuma përrallore” nga Gazpromi rus për projekte energjetike në Shqipëri.
Ambasada ruse, në një postim në rrjetin social “Facebook” shkruan se janë habitur nga fjalët e Berishës.
“U habitëm nga fjalët e Sali Berishës se 10 vjet më parë ai refuzoi rryshfetin gjoja të propozuar nga Gazprom për zhvillimin e projekteve energjetike në Shqipëri. Na lind natyrshem pyetja: sa kërkoi zoti Berisha që as Gazpromi nuk mundi t’i mbledhë dot ato “shuma përrallore”?”,-shkruan ambasada ruse në reagimin e saj.
Ditën e djeshme, Berisha teksa foli për mediat para Kuvendit të Shqipërisë u shpreh:
“I them mafies së George Sorosit, që më ka shpallur “non grata” për korrupsion, se vetëm për TAP-in, Sali Berishës i janë ofruar shuma përrallore, por qëndrova në mbrojtje të interesave të vendit tim dhe Europës, pasi isha i bindur se një “darë” gazi rus në vendin tonë ishte lajmi më i keq për Europën”./Opinion.al
