Klubi francez i Nantes është përfshirë në polemika për shkak se trajneri i saj, Antoine Kombouare, ka përjashtuar nga skuadra një nga futbollistët, për arsye se ai refuzoi të prishte agjërimin ditën e ndeshjes.
Bëhet fjalë për mbrojtësin algjerian Jaouen Hadjam, i cili nuk u grumbullua për ndeshjen e fundjavës së kaluar, ndaj Reims.
20-vjeçarit iu kërkua që ditën e ndeshjes të hante dhe të pinte me shokët, për të qenë në formën më të mirë të mundshme, por ai nuk pranoi ta bënte këtë gjë.
Kur u pyet për këtë çështje, trajneri Kombouare tha: “Nuk ka vend për polemika. Ajo ishte zgjedhja e tij dhe unë e respektova. Nuk ishte ndëshkim, por unë kam një metodë pune. Gjatë javës, nuk kam asnjë problem me lojtarët që agjërojnë. Jam i gatshëm që t’i mbështes sepse e di që nuk është e lehtë për ta. Por, në ditën e ndeshjes, nuk duhet agjëruar. Ata që agjërojnë atë ditë, nuk janë pjesë e ekipit për ndeshjen sepse nuk dua që të dëmtohen”.
