Presidenti i Francës, Emmanuel Macron, ka reaguar pas bisedës me homologun e tij amerikan, Donald Trump, të bërë nga Tirana.
Macron thotë se refuzimi që Presidenti rus, Vladimir Putin, i bën armëpushimit tregon se nuk e dëshiron paqen, por synon të fitojë kohë duke vazhduar luftën.
“Sapo zhvilluam një bisedë nga Shqipëria me Presidentin Trump. Edhe një herë, Presidenti Putin nuk i është përgjigjur propozimit për një armëpushim të pakushtëzuar, të bërë nga Shtetet e Bashkuara dhe të mbështetur nga Ukraina dhe vendet evropiane. Duke refuzuar armëpushimin dhe dialogun me Ukrainën, Rusia tregon se nuk e dëshiron paqen, por synon të fitojë kohë duke vazhduar luftën”, shkroi Macron në rrjetet sociale.
Megjithatë Macron bën me dije se Franca do të vijojë të koordinohet me partnerët europianë dhe me SHBA-në për të “përcaktuar një përgjigje të përbashkët”.
Gjatë bisedës me Donald Trump, në tryezë ka qenë i pranishëm edhe kancelari gjerman Friedrich Merz. Ky i fundit bëri me dije në rrjetet sociale se nuk do të hiqet dorë nga ndihma për Ukrainën me qëllim që t’i jepet fund luftës.
“Ne do të vazhdojmë ta ndihmojmë Ukrainën për t’i dhënë fund luftës. Nuk do të heqim dorë. Së bashku me Presidentin Zelensky jemi të një mendjeje se Rusia ka pasur një mundësi të mirë këtë javë për të nisur bisedimet e para drejt një marrëveshjeje paqeje, duke filluar me një armëpushim paraprak. Jemi shumë të zhgënjyer që kjo nuk ka ndodhur”, tha Merz.
Ndërsa kryeministri britanik Keir Starmer, po ashtu i pranishëm me bisedën me Trump, u shpreh se nëse Rusia nuk ulet në negociata atëherë Putin duhet të përballojë pasojat.
“Në bisedë me Presidentin e Shteteve të Bashkuara, po harmonizojmë nga afër reagimin tonë ndaj qëndrimit të papranueshëm të Rusisë”, tha Starmer.
Rusia dhe Ukraina zhvilluan këtë të premte bisedime të drejtpërdrejta për paqe për herë të parë që nga viti 2022, në qytetin port të Stambollit në Turqi. Bisedimet përfunduan pas më pak se dy orësh, sipas Ministrisë së Jashtme turke dhe një zyrtari ukrainas.
Moska nuk i ka pranuar thirrjet e Ukrainës, vendeve evropiane dhe Shteteve të Bashkuara për një armëpushim të plotë 30-ditor, duke thënë se armëpushimi mund të bëhet vetëm si rrjedhojë e bisedimeve.
Po ashtu, presidenti rus, Vladimir Putin, hodhi poshtë ftesën e presidentit ukrainas, Volodymyr Zelensky, për t’u takuar ballë për ballë për herë të parë që nga viti 2019.
Zelensky u shpreh nga Tirana rreth fundit të luftës se “Ukraina është e gatshme të ndërmarrë hapat më të shpejtë të mundshëm për të sjellë paqe të vërtetë dhe është thelbësore që bota të mbajë një qëndrim të fortë dhe të bashkuar”./tvklan.al
