Kryeministri i Shqipërisë, Edi Rama merr pjesë në takimin me liderët e vendeve përgjatë rrugës ballkanike të migrimit, kud do të diskutohen mënyrat për mbrotje më të mirë të kufijve të jashtëm të BE-së.
Takimi mbahet në Vjenë, të ftuar janë kryeministri grek, Alexis Tsipra dhe kancelarja gjermane, Angela Merkel, pasi vendet e tyre paraqesin pikën e hyrjes dhe të destinimit të migrantëve dhe refugjatëve, raporton agjencia DPA nga Vjena.
Kancelari i Austrisë, Christian Kern, thotë se samiti parashihet të ndihmoje në gjetjen e zgjidhjeve të përbashkëta.
“Samiti ka për qëllim që të jetë hap në drejtim të duhur dhe të ndihmoj në krijimin e presionit për gjetjen e zgjidhjeve të përbashkëta për këto çështje”, tha Kern, raporton REL.
Në takimin e fundit të këtillë në Vjenë në muajin shkurt, liderët e vendeve të Ballkanit dhe Austria, patën vendosur ta mbyllin rrugën ballkanike.
Pos Austrisë, Gjermanisë, Greqisë, në këtë samit marrin pjesë edhe përfaqësuesit e Turqisë, Maqedonisë, Serbisë, Shqipërisë, Kroacisë, Sllovenisë, Rumanisë dhe Hungarisë.
Pritet edhe pjesëmarrja e komisionarit për migrim të Bashkimit Evropian, Dimitris Avramopoulos.
