Nga Dritan LACI-
Kryeministri Rama u kthye dje për të disatën herë në tre vitet e fundit në Peqin, një zonë në të cilën në vitin 2013 pati bërë premtime të bujshme, gati sureale; premtime të cilat me siguri kur ua kujton sot, edhe vetë peqinasit duhet të ndihen keq për duartrokitjet që i dhuronin listës së premtimeve sot të pambajtura të atij që më pas do të ishte kryeministri i Shqipërisë.
I njëjti që po dje në një takim me fermerët e Peqinit, të njohur për mbarështimin e gjelave të detit por edhe për një festival ekzotik po kaq të njohur të luftës me gjela, nuk pati durimin të dëgjojë një vajzë të re e cila teksa doli jashtë rreshtit të atyre që tundnin kokën në shenjë aprovimi, filloi ti qahej kryeministrit të saj për faktin që edhe pse kishte përfunduar Infermierinë me notën 8.5; Edhe pse kishte përfunduar Masterin me 9.2 (të paktën kështu thoshte); Edhe pse i kishte dërguar letër pas letre kryeministrit, ku edhe pse kishte këto mesatare askush nuk e merrte në punë (dhe për këto ishte e gatshme të tregonte edhe letrat që kishte me vete); Edhe pse i kujtoi kryeministrit që ka dy vite që ka licensën e punës dhe nuk kishte marrë asnjë përgjigje nga Drejtoria Shëndetësore Elbasan dhe Peqin (dhe për këtë ishte e gatshme ti tregonte dokumentet që kishte me vete); Kryeministri Rama jo vetëm që nuk pati durimin ta dëgjojë vajzën deri në fund dhe minimalisht ti kërkonte ndjesë për mosmbajtjen e premtimeve, por u tregua një arrogant i pashembullt duke ju drejtuar me fjalët: “Nuk kam nevojë për dokumenta, se s’kam ardh këtu për… për të shtuar më tej; “Nuk je e vetmja që kërkon një punë si Infermiere dhe midis dhjetra e dhjetra e dhjetra kërkesave…
” Kaq dëgjuam nga bashkëbisedimi i “frytshëm” midis Kryeministrit dhe vajzës që kishte përfunduar studimet Master me mesatare 9.2 por që nuk i ofronin punë. Pasi në këtë moment, aq sa na mundëson RQKSH (Regjia Qendrore e Këshillit të Ministrave), kryeministri Rama i kërkon vajzës të jetë e sjellshme (edhe pse vetë nuk është fort i sjellshëm) dhe t’ja kalojë mikrofonin dikujt tjetër pasi nuk do bënte debat me të.
Ishte sërish vajza që i kujtoi Kryeministrit fjalët shpresëmëdha që ai u kishte thënë të rinjve tri vite më parë para se të bëhej i tillë, eksplicisht citoj folësen: “Në bazë të asaj që ti ke deklaruar para medias; “Studentët e mirë unë do i vlerësoj dhe do i ndihmoj për vendet e punës”; ndërsa për mua deri më sot asgjë nuk është bërë. Unë isha në shkollë kërkoja bursë dhe nuk ma jipshin, sot kërkoj punë dhe sma japin”.
Kaq dëgjuam nga komunikimi midis kryeministrit dhe vajzës me mesatare masteri 9.2 dhe gjithsecili që e ka ndjekur këtë bashkëbisedim duhet të jetë ndarë me një shije të hidhur. Jo vetëm për arrogancën që tregon kryeministri në vazhdimësi por edhe për një ligjëratë të kthyer gati në refren ku edhe pse po i afrohet muajve të fundit të mandatit të tij katërvjeçar si kryeministër, Rama vazhdon ti trembë bashkëdëgjuesit (pasi vetëm bashkëbisedues nuk ka në forumet e tij) me gogolin e Berishës.
Aq sa, sa herë e dëgjoj më kujton rahmet pastë plakën Inxhiko në mëhallë, ku sa herë i kërkonim të na tregonte një përrallë, ja niste; “Na ishte njëherë…” Ku ashtu si në përrallat e nondajave të rrjedhura nga vitet mbi supe, edhe kryeministri Rama e fillon gjithmonë ligjëratën e tij për realizimet e reformave me: “Na ishte njëherë një plak matuf me emrin Sali”… “ Na ishte njëherë një Katallan me emrin Sali”… “Na ishte njëherë një i rrjedhur që bërtiste rrugë, rrugë, rrugë”… Dhe kështu me përrallën e Saliut plak, Rama po mbyll vitin e katërt në qeverisje.
Sigurisht që të gjithë e dinë që nuk ka mbetur më gomerë Peqini që të mos e kuptojë që forumi me fermerët e zonës nuk është qëllimi i bashkëbisedimit me ta; qëllimi i zgjidhjes së halleve të tyre; qëllimi i gjetjes së një mënyre që fermerëve të mos u mbetet prodhimi stinor në depo; qëllimi që të rinjtë të mos i ikin tokës, por ta punojnë.
Sigurisht që jo. Pasi tashmë është fare e kuptueshme që qëllimi i vetëm është përdorimi si fasadë i fermerëve, duke mos folur për hallet e tyre, por për Saliun dhe armiqtë në drejtësi. Se ç’i hyn në punë një fermeri në Peqin apo në Shishtavec të Kukësit në u votua apo jo Vetingu këtë e kupton vetëm Rama. Dhe këtë ja tregoi më së miri kryeministrit vajza që nuk ja mësuam emrin. Ajo e cila i tregoi Ramës përballë RQKSH-së së tij (Regjia Qendrore e Këshillit të Ministrave) se thënia e tij lapidare se “Punë ka por profesionistë s’ka” është demagogji për të mbuluar paaftësinë e qeverisë për tu siguruar të rinjve një jetë më të mirë në vendin e tyre.
Është po kaq demagogjike sa premtimet që Rama jepte para peqinasve tre vite më parë ku bashkë me atë që do ishte më pas deputeti i Peqinit, z. Alfred Peza,bashkëpremtonin: “Në katër vite do hapim njëmijë vende pune”; “Do të marrë fund historia ku në Peqin 10 veta merrnin 10 rroga dhe tjerët janë pa punë”; “Çdo çift i ri, njëri prej tyre do jetë patjetër në një punë të mirë”. Dhe jo vetëm kaq po premtimet vazhdonin; “Stadium me drita për Peqinin”; “Televizioni Shkumbini Channel sipas modeleve më të mira Milan Channel, Inter Channel e kështu me radhë”; “Fushë me ndriçim natën me stërvitje” “Binjakëzim me ekipin e Lazios”. Ndërsa Rama shtonte; “Ne duam ti japim Peqinit mundësinë të Rilindë”.
Në fakt se çfarë është bërë në Peqin këto tre vite dhe çfarë ka mbetur nga shkëlqimi i atyre premtimeve është mirë të flasin peqinasit. Ajo që mund të themi është se ajo vajzë dje që nuk ja mësuam dot emrin tha një të vertetë që nuk e fsheh dot as RQKSH-ja e Kryeministrit. Nuk e fsheh dot as anatemimi i vazhdueshëm nga kryeministri aktual i plakut Sali. Nuk e fsheh dot as përralla; “Na ishte njëherë Shqipëria…” Këtë të vërtetë nuk e fshehin dot as të vertetat e një gjermani si Gunther Krichbaum i cili sigurisht që nuk e di ku bie Peqini apo Shishtaveci, por nuk është aq i pa përditësuar sa të mos e di se Shqipëria është një vend ku vota blihet, ku të drejtat e njeriut nuk respektohen, ku hashashi gjelbëron fushat dhe malet e kështu me radhë.
Sigurisht që ajo vajzë që dje s’ja mësuam dot emrin nuk do shkojë ti kërkojë llogari Saliut. Sepse nuk është Saliu kryeministri i saj. Asaj dhe çdo të riu në Shqipëri i intereson e ardhmja dhe bashkëbisedimi me kryeministri aktual dhe ata që do të pasojnë. Po ashtu edhe fermerit, edhe mësuesve, edhe studentëve… Pyetja që qytetarët duhet ti ngrejnë Ramës sot është; “Edhe sa kohë do u thuash qytetarëve të tu: “Fajin ua ka Saliu”…”Edhe sa kohë do fshihesh pas gjethes së fikut të Saliut”. Nuk e kupton që po vetëplakesh duke bërtitur: Saliu… Saliu… Saliu. “ “Po ti vetë çdo bësh diçka më shumë se Saliu që të mos mbetesh në mendjen e shqiptarëve si kryeministri që dilte arave e maleve të Shqipërisë dhe bërtiste: Saliu…Saliu…Saliu”… Në fund; “Edhe sa kohë do japësh llogari si Saliu”. “Edhe sa kohë do e kërkosh votën sikur të jesh Saliu…” “Z. Rama kur do fillosh te besh kryeministrin Rama”
/Opinion.al
*Vajza që i kujtoi premtimet e punësimit
