Gatishmërisë së kryeministrit Edi Rama për t’u takuar me opozitën e për të diskutuar me të për reformën zgjedhore pa vonesë, kryetari i Partisë Demokratike, Lulzim Basha iu përgjigj duke i kujtuar se për këtë reforme s’ka gjë për të diskutuar më shumë se drafti i paraqitur në tryezën e OSBE –së.
Ta zbatoje atë ose të largohet, tha Basha të mërkurën. Po të mërkurën kryeministri me ironi u përgjigj: “Është njësoj sikur një karroce me kalë t’i thotë një treni hap krahun…Nuk po flas për tërmetin artificial të opozitës.”
Këtë të enjte, Rama i shtriu sërish dorën opozitës parlamentare dhe asaj jo parlamentare për reformën zgjedhore.
“Reformën zgjedhore edhe pa ju do ta bëjmë. Po them ju, për ju që jeni këtu, se për ata që nuk janë këtu, që thonë hap krahun, unë nuk kam parë… Unë nuk kam parë, që t’i thotë një këmbësor që rri tek hija e fikut një makine, hap krahun, cilin krah me? Ku? Ta kemi dhënë planin, zbatoje. Ou? Me çfarë dekreti hyjnor e ke marrë ti të drejtën që të më çosh mua planin, kush je ti një herë? Kë përfaqëson? Ata që përfaqëson i ke lënë në rrugë bashkë me veten. Megjithatë, ata janë të mirëpritur në çdo moment, unë e kam thënë dhe e përsëris, unë ju kam të gjithëve njësoj. Juve këtu dhe ata atje. Për ata atje kam më shumë dhimbje dhe kujdes se janë në një hall më të madh”, tha Rama.
Partia Demokratike ka propozuar që reformën zgjedhore ta drejtojë një strukturë ekstraparlamentare e udhëhequr nga ndërkombëtarët, në përbërje të së cilës të jenë edhe dy përfaqësues; një nga maxhoranca dhe një nga opozita e bashkuar.
Ndërsa kryeministri thotë se ajo do të behet vetëm sipas rekomandimeve të OSBE –së dhe shpreh besim se mund të mbyllet brenda vitit, si pjese e kushteve të vendosura nga Bundestagu për negociata./ Opinion.al
