Opozita paralajmëroi se do të mbledhë nesër grupin e punës për reformën zgjedhore.
Sipas burimeve opozita ka vendosur që grupi i punës për Reformën Zgjedhore të drejtohet në nivel politik nga Sekretari i Përgjithshëm Gazment Bardhi. Nga Partia Demokratike do të jenë pjesë e grupit Oerd Bylykbashi, Ivi Kaso, Enkelejd Alibeaj, Çlirim Gjata, Endri Hasa dhe Arben Ristani.
Të gjitha partitë e koalicionit do të kenë përfaqësuesit e tyre në grup pune. LSI ka caktuar 3 përfaqësues; PR dhe PDIU nga 2 përfaqësues; PAA, PDK, LZHK, PBDNJ nga 1 përfaqësues.
Më herët, sekretari i përgjithshëm i PD Gazment Bardhi deklaroi se opozita mbetet e angazhuar me reformën zgjedhore dhe se qëndrimi është bërë i qartë në tryezën e OSBE.
“Opozita është thellësisht e angazhuar me Reformën Zgjedhore. Ne kemi bërë të qartë tek Tryeza e organizuar nga OSBE që duam të japim kontributin tone për Reformën. Për këtë qëllim, nesër në orën 9:30, do të mblidhet grupi i punës së opozitës së bashkuar për reformën zgjedhore”, deklaroi Bardhi.
Ditën e nesërme mazhoranca dhe opozita parlamentare kanë njoftuar gjithashtu mbledhjen e komisionit të posaçëm për Reformën Zgjedhore por ai është shpallur jo legjitim nga opozita jashtë parlamentit e cila ka vendosur të mos çojë asnjë përfaqësues ose propozim. /Opinion.al
