Pas bojkotit të mbledhjes së fundit, përfaqësuesit e opozitës në Këshillin Politik për Reformën Zgjedhore kanë propozuar që mbledhja e radhës të mbahet të hënën.
Përfaqësuesit opozitar shprehen se synojnë mbylljen sa më shpejt të reformës. Bëhet me dije se Oerd Bylykbashi i Partisë Demokratike dhe Petrit Vasili i Lëvizjes Socialiste për Integrim u kanë dërguar një letër përfaqësuesve parlamentarë në ketë grup Damian Gjiknuri dhe Rudina Hajdari.
Po ashtu, opozita ka vënë në dijeni dhe ndërkombëtyarët për qëndrimin e tyre ndaj Reformës Zgjedhore, si BE, SHBA, OSBE dhe KiE.
Përfaqësuesit e opozitës nuk kanë harruar që të vënë në dukje përgjegjësinë edhe përpjekjet e qeverisë për të dështuar procesin, përfaqësuesit e opozitës theksojnë në letër vullnetin e saj për zgjedhje të lira e të ndershme. Duket se pavarësisht takimeve të shpeshta për reformën, duket se palët ende janë larg një konsensusi.
“Rifillimi i procesit më 11 maj është goditur vazhdimisht nga deklarata dhe veprime që kanë shkaktuar krizë politike e që, qartazi, kanë patur si qëllim shkatërrimin e këtij procesi jetik politik. Por, pavarësisht këtyre veprimeve të qëllimshme, Opozita e Bashkuar nuk do të heqë dorë nga objektivi i saj për të përmbushur pa vonesë obligimin e saj para shqiptarëve për zgjedhje demokratike. Deklarimet tuaja se është gjetur kompromisi për një sërë çështjesh janë të pavërteta dhe synojnë vetëm fshehjen e të vërtetës që deri më sot nuk ka kompromis për çështjet themelore, për të cilat Opozita e Bashkuar ka paraqitur propozime konkrete.”- shkruajnë Oerd Bylykbashi dhe Petrit Vasili./ Opinion.al
