Komisioni për Reformën Zgjedhore ka zhvilluar sot mbledhjen e radhës. Pas përfundimit të mbledhjes anëtari i PD në tryezën e Komisionit për Reformën Zgjedhore Oerd Bylykbashi ka propozuar futjen e planifikimit biometrik të zgjedhësve dhe numërimin elektronik të votavenë sistemin zgjedhor.
“Opozita ka bërë propozimin për një nga çështjet kryesore. Futja e planifikimit biometrik të zgjedhësve dhe numërimin elektronik të votave. Probleme të tilla janë kanceri i procesit të votimit. Propozimi ynë i sotëm është një adresim i drejtëpërdrejtë. Kemi kohë që e propozojmë shpresojmë se do të kemi dakordësi që shqiptarët në të gjitha qendrat e votimit të identifikohen në mënyrë të besueshme. Ti lëmë kohën e mjaftueshme për të marrë propozimet tona. Propozimi ynë është i thjeshtë”, tha Bylykbashi.
Ndërkohë, bashkëkryetari i Komisionit për Reformën Zgjedhore Damian Gjiknuri, ka deklaruar se nuk përjashtohet mundësia e numërimit elektronik për shkak se ajo do të ndikojë edhe depolitizimin e komisionerëve.
“Kemi qenë dakord që të përfshihet teknologjia në zgjedhje. Ne do të konsultohemi dhe me ekspertë dhe do të shohim si do ta përfshijmë këtë teknologji. Kjo është qasja që ka mazhoranca dhe qeveria. Nëse kjo është e realizueshme do bëjmë konsultimet e nevojshme por në parim, ka qenë që parimet t’i vendosim në ligj. Një nga qëllimet që ne kemi pasur është edhe depolitizim i Komisioneve Zgjedhore dhe teknologjia ndihmon në këtë proces. Ditën e martë PD do sjellë propozimet e saj për çështjet e financimit të fushatave. Nëse PD do i sjellë të gjitha propozimet besoj se në 2 javët e mbetura do kemi rezultate. Prokuroria ka sjellë disa përgjigje. Ne kemi rënë dakord që krimet zgjedhore të hetohen nga SPAK. Kemi rëndë dakord që roli i policisë të jetë sinjalizuese. Ky është një proces që po trajtohet nga ekspertët. Ne jemi të gatshëm të ketë edhe një mbikëqyrje më të thellë të proceseve zgjedhore. Mazhoranca nuk ka asgjë kundër”, tha Gjiknuri.
Po ashtu, pas përfundimit të mbledhjers foli për mediat dhe bashkëkryetarja e Komsionit për Reformën Zgjedhore Rudina Hajdari. Ajo theksoi se propozimi i saj ishte për verifikimin e kandidatëve nëse kanë qenë apo jo bashkëpunëtorë të sigurimit të shtetit
“Ka ardhur koha që ne ta hedhim këtë hap. Mendoj se ky është hap shumë i mirë dhe u gjet një dakordësi për këtë propozim. Kjo do të pastrojë njëherë e mirë politikën nga ata persona që kanë pasur gisht në internimin dhe vrasjen e shumë shqiptarëve gjatë regjimit komunist. Kemi rënë dakord për përdomin e teknologjisë gjatë procesit zgjedhor. Palët janë duke punuar bashkë dhe ekspertët do vihen në punë për aplikimin e teknologjisë. Në mbledhjen e ardhshme do flasim për ndryshimin e sistemit”, u shpreh Hajdari
Hajdari ka propozuar ndryshim të kodit zgjedhor. Në propozimet e saj dërguar kryetarit të Kuvendit Gramoz Ruçi theksohet verifikimi i figurave publike duke synuar sipas saj transparencë, besueshmëri në zgjedhjet e përgjithshme./ Opinion.al
