Kryetarja e LSI-së Monika Kryemadhi është shprehur se Reforma Zgjedhore të bëhet para 15 marsit. Sipas saj, opozita është e gatshme të paraqesë rekomandimet saj, dhe për këtë arsye reforma mund të përshpejtohet.
“S’kemi pse presim 15 marsin nëse është vullneti politik. Opozita është gati për të dhënë rekomandimet e veta që tani. Sa më shpejt të ecim me reformën zgjedhore do të jetë proces pozitiv. Ajo që dua të them është që në 9 kushtet e Bundestagut pika të cilën ka detyrim opozita është miratimi i reformës zgjedhore, maxhoranca ka detyrim implementimi. Ne nga BE nuk ka kërkohet të diskutojmë ndryshimin e sistemit por të reformës zgjedhore. Ndryshimi i sistemit nuk është as në 9 kushtet e Bundestagut. Dëshira për të ndryshuar sistemin ka vetëm një njeri, është Edi Rama, i cili hedh këtë ide. Edi Rama i ka votat. Ai i ka mundësitë për të ndryshuar sistemin dhe për të bërë ndryshimet kushtetuese. Po të dojë ai mund ta ndryshojë. Ne si LSI nuk jemi pjesë e atij parlamenti që të themi të kushtëzojmë votën tonë. Përfaqësuesit e Nismës Thurrje i njoh dhe i vlerësoj për inisiatvën por kjo nuk është në dorë të opozitës, por në dorë të Edi Ramës sepse dhe po të duam të ndryshojmë sistemin Edi Rama vendos veton. Pastaj parlamenti i ri le të miratojë ligjin për referendumin dhe të vendosë populli nëse do ndryshim të sistemi. Për mua si kryetare është komode me lista të hapura. Hapja e listave do të jetë pozitivitet shumë i mirë sepse nuk do të ketë hatërmbetje brenda partisë”–tha Kryemadhi.
Po ashtu, Kryemadhi ka komentuar padinë e kryeministrit Edi Rama ndaj homologut të tij në Kosovë, Ramush Haradinaj. Për Kryemadhin kjo ishte vetëm një provë që fakton rrezikshmërinë që paraqet Kryeministri, që në ditën e masakrës së Reçakut padit në gjykatë luftëtarin e UÇK-së dhe vëllain e dëshmorëve që çliruan Kosovën.
“Shqipëria është në një rrezikshmëri të madhe sepse me Edi Ramën rrezikohet çdo ditë e më shumë. Mjafton të shohim se çfarë ndodhi dje, ditën e përkujtimit të viktimave të Reçakut Edi Rama gjeti momentin për të paditur luftëtarin e UÇK-së, vëllain e dëshmorëve që çliruan Kosovën me gjakun e tyre, në gjykatë. Ky është Edi Rama, mendoni çfarë bën në një moment të tillë dhe çfarë mund tu bëjë akoma më shumë keq shqiptarëve”-u shpreh kryetarja e LSI./ Opinion.al
