TIRANE- Kryeparlamentari Ilir Meta i është përgjigjur letrës së Partisë Demokratike për ngritjen e Komisionit të Posaçëm Parlamentar për Reformën Zgjedhore. “Vendimi do të merret në seancën parlamentare të 28 janarit”, thotë Meta.
Në një letër drejtuar kryetarit të Kuvendit, demokratët theksojne se duhet nisur pa vonesa puna për të përmbushur rekomandimet e OSBE-së lidhur me shqetësimet e ngritura nga vëzhguesit ndërkombëtarë për zgjedhjet e 2013-ës dhe ato te 2015-ës. “Reforma duhet të pamundësojë përdorimin e pushtetit publik për qëllime të përfitimit në zgjedhje, blerjes masive të votave me paratë e krimit të organizuar, përdorimit të institucioneve shtetërore si mekanizëm për të siguruar vota apo për të ushtruar presion mbi votuesit, si dhe keqpërdorimin politik të Policisë së Shtetit”, thuhet në letrën e PD.
I menjëhershëm ka qenë reagimi i kreut të Kuvendit. Meta bie dakord me PD-në se “Reforma Zgjedhore duhet trajtuar me seriozitet dhe në përputhje me frymën e rekomandimeve të OSBE-ODIHR dhe të kryhet në kohën e duhur dhe transparencë të plotë. E ndërsa procesi është në prag të nisjes, një tryezë pritet të organozohet të martën, ku janë ftuar edhe Edi Rama, Lulzim Basha dhe Ilir Meta.
