Damian Gjiknuri, bashkëkryetari i Komisionit të Posaçëm për Reformën Zgjedhore, duke theksuar se PS nuk është kundër sistemit të ri zgjedhor, deklaroi se Shqipëria do të ketë sistemin aktual deri në vitin 2022.
Po ashtu, në një prononcim për mediat, Gjiknuri i bëri thirrje opozitës që të të sjellë propozimet e saj qoftë për procesin, teknologjinë apo edhe për sistemin zgjedhor.
“Kuti të caktuara do të hapen për t’u riparë, kjo do të sjellë një transparencë të madhe ligjore. Këto kuti do të hapen pas përfundimit të procesit dhe kjo synon integritetin dhe një transparencë. Opozita solli një propozim dhe këtë do e bëjmë në një seancë të veçantë. Edhe aktorë të tjerë do të jenë të ftuar dhe do të bëjnë propozimet. Procesi do të shoshitet me kohë dhe të adresojmë çështjet të cilat janë kundër rekomandimeve të OSBE. Draftet e paraqitura për kodin zgjedhor janë ende teknike. Besoj se deri në vitin 2022 këtë sistem zgjedhor do të kemi. Vijojmë t’i qëndrojmë mendimit që opozita të sjellë propozimet dhe ne qëndrojmë të hapur. E presim PD dhe partitë e tjera të opozitës të vijë. Teknologjia është një mënyrë për t’u adresuar dhe kërkon kohën e saj. Edhe PD në dijeninë time ka qenë e përfshirë në këtë proces dhe propozim. Po mendojmë fazat ku do të shtrihet ky proces, teknologjia mund të kërkojë më shumë kohë por ne nuk mund të qëndrojmë pa bërë zgjedhje sepse nuk ka teknologji. Çështja e sistemit është një çështje kushtetuese. Kemi dhe ne pretendimet apo propozimet edhe pse ky sistem në mendimin tim nuk është i keq. Ja kemi lënë këtë opozitës dhe nëse biem në konsesus atëhere i përket Kushtetutës,”-tha Gjiknuri.
Ndërkohë, bashkëkryetarja Rudina Hajdari, foli në lidhje me draftin i cili do të parashikojë burgosjen e personave që shesin e blejnë votën.
Hajdari u shpreh se“çdokush që tenton të vjedhë votën jo thjesht do ndiqet penalisht por do gjehet mekanizmi që ai të shkojë në burg, kjo do ngrejë llogaridhënien. Ky takim ishte për të shqyrtuar këtë kërkesë që ka ardhur nga BE që ne të ndëshkojmë ata që abuzojnë me shit-blerjen e votës”.
E pyetur për deklaratat e dhëna më parë nga vetë ajo, se ka dyshime që mund të ketë një marrëveshje që po diskutohet me dyer të mbyllura mes PS e PD për reformën zgjedhore, Hajdari tha se i referohet të shkuarës.
“Memoria politika na tregon qartë se kjo ka ndodhur, i referohem 2008, 2017, ajo që po kërkoj është të kemi njq reformë të hallkave zgjedhore në mënyrë transparente e ky proces të mos bëhet për dy partitë kryesore, të bëhen për të gjitha subjekte që do hyjnë në garë”.
Ndërsa kur u pyet nëse në zgjedhjet e ardhshme parlamentare do garojë nën siglën e ndonjë subjekti politik aktual apo me parti të re, Hajdari nuk konfirmoi asgjë, por u shpreh se “e rëndësishme është të krijojmë kushtet për të gjithë jo për Rudinën”.
