Sot pritet të rinisë puna në tryezën për Reformën Zgjedhore pas një pezullimi dy javor për shkak të çështjes së godinës së teatrit. Përfaqësuesit e Këshillit Politike do të ulen sot në tryezën e përbashkët për të diskutuar një numër çështjesh dhe të ketë vendimarrje politike rreth tyre.
Axhenda e sotme përfshin diksutimin mbi çështjen e periudhës zgjedhore, financimin e fushatës zgjedhore, respektimin e kuotës gjinore, përdorimin e teknologjisë së informacionit dhe konkretisht, vendosjen e kamerave monitoruese në ambientet e votimit, rolin e Policisë në procesin zgjedhor, aktivizimin e bilbilfryrësve dhe klasifikimin e veprave penale në korrupsion zgjedhor dhe për pasojë trajtimin e tyre nga SPAK.
Pika e parë, ajo e periudhës zgjedhore shihet si një pikë ku palët mund të arrijnë konsensus. Deri tani është hedhur ideja që periudha zgjedhore të jetë në prill por megjithatë kjo do të diskutohet edhe më tej pasi kjo periudhë përkon me festimin e Pashkëve dhe sipas ekspertëve, ul efikasitetin e fushatës.
Një risi që pritet të futet për herë të parë në kodin zgjedhor janë bilbilfryrësit të cilët konsiderohen punonjësit e administratës që raportojnë për parregullsitë në procesin zgjedhor.
Çështja e sistemit zgjedhor pritet të jetë përsëri në tryezë. Deputetja Rudina Hajdari ka kërkuar fort ndryshimin e sistemit aktual dhe adaptimin e një sistemi me lista të hapura. Sipas saj ndryshimi po bllokohet nga opozita dhe mazhoranca ndërkohë nga ana e tyre sistemi nuk është çështje e mbyllur por ende nuk ka një qëndrim të qartë rreth kësaj çështjeje. /Opinion.al
