Në mbledhjen e sotme të Kryesisë së Partisë Demokratike dhe ish-grupit parlamentar demokrat, Lulzim Basha ka deklaruar se opozita e ka gati zgjidhjen për Reformën Zgjedhore por akuzoi kryeministrin Rama se ai po e mban peng atë.
“Edi Rama për të penguar zgjidhjen e krizës politike ka bllokuar edhe Reformën Zgjedhore, ka penguar gjithëpërfshirjen për realizimin e saj, po bën gjithçka për ta shtyrë dhe për ta vonuar. Ne këtë nuk mund ta pranojmë. Miratimi dhe më pas implementimi i Reformës Zgjedhore, me konsensus, është parakusht për zgjidhjen e krizës së rëndë politike dhe i hap rrugë zgjedhjeve të parakohshme parlamentare dhe lokale”, tha kreu demokrat.
Basha garantoi se PD dhe opozita kanë gati zgjidhjen, por që kjo të bëhet e mundur, duhet që Rama të hapë rrugën.
“Grupi i punës së opozitës ka gati zgjidhjet në kuadër të Reformës Zgjedhore dhe pret që Edi Rama t’i hapë rrugë procesit konsensual për diskutimin dhe miratimin e tyre”.
Basha sqaroi ish-deputetët dhe anëtarët e kryesisë së po punohet për zgjidhje politike dhe të koordinuar me partnerët ndërkombëtarë.
“Po punojmë çdo ditë për zgjidhje politike, po punojmë çdo ditë që veprimet tona të jetë të koordinuara me partnerët ndërkombëtar që e kanë ndihmuar gjithmonë Shqipërinë, me përgjegjshmëri dhe në mënyrë të sinqertë. Por jemi gati dhe do duhet të jemi gati për çdo veprim, për çdo vendim”, deklaroi ndër të tjera Basha. /Opinion.al
