Partia Demokratike ka kërkuar rikthimin e Komunave.
Në amendamentin e zbardhur ditën e sotme sa i takon Reformës Territoriale, për ndryshimet kushtetuese, selia blu propozon që të rikthehen Komunat.
Në nenin 4 të dokumentit thuhet se njësitë e qeverisjes vendore janë komunat, bashkitë dhe qarqet. Me këtë ndarje, Bashkitë do të administrojnë zonat urbane, ndërsa komunat të përfshijnë territoret kryesisht rurale.
Neni 4
Pika 1 dhe 3 e nenit 108 ndryshohet si vijon:
“1. Njësitë e qeverisjes vendore janë komunat, bashkitë dhe qarqet. Njësi të tjera të qeverisjes vendore rregullohen me ligj.
- Komuna dhe bashkia janë njësi bazë të qeverisjes vendore. Komunat përfshijnë vetëm territore rurale, ndërsa bashkitë përfshijnë kryesisht territore urbane dhe vetëm pjesërisht territore rurale. Ato kryejnë të gjitha detyrat vetëqeverisese, me përjashtim të atyre që me ligj u jepen njësive të tjera të qeverisjes vendore.”./Opinion.al
