Bashkëkryetarja e Komisionit të Posaçëm të Reformës Administrativo-Territoriale, Dhurata Çupi, prezantoi në seancën e sotme në parlament, propozimet e grupit të deputetëve mbështetës të Enkelejd Alibeaj, për ndarjen e re territoriale.
Në fjalën e saj Çupi propozoi rritjen e numrit të bashkive nga 61 në 94 për atë që ajo e cilësoi “pushtet të shëndetshëm vendor”.
“PD kërkon një Konsensus të gjerë për riorganizimin të ri territorial. Është momenti për të patur një pushtet vendor të shëndetshëm. Mbajtja e një numri prej 61 bashkish rëndon shumë mbi demokracinë lokale. Partia Demokratike propozon kalimin nga 61 bashki në 94 bashki”, tha Çupi.
Teksa tha se pas 7-vitesh të zbatimit të reformës aktuale janë të qarta problematikat, Çupi nënvizoi se një reformë e re më afër qytetarit është e nevojshme.
“Pas 7-vitesh të zbatimit të reformës janë të qarta problematikat, mungesë e përfaqësimit të ish-komunave në Këshillin Bashkiak, mungesë e marrjes së shërbimeve nga qytetarët, mungesë transparencës dhe llogaridhënie, si dhe përhapje e korrupsionit”, tha Çupi.
