Sapo ka përfunduar tryeza e ekspertëve për Reformën në Drejtësi e cila u braktis pasdite nga përfaqësuesit e opozitës dhe vijoi vetëm me ekspertët e majtë.
Në një dalje për mediat, ekspertët e majtë thanë se nëse nesër nuk vjen opozita në takim do të shkohet me draftin që ka përgatitur grupi i ekspertëve të nivelit të lartë.
“Nëse opozita nuk vjen kjo është çështje e tyre, ne presim opinion e tyre. Janë shumë pak çështje që ne nuk gjejmë gjuhën e përbashkët.Shpresojmë që nesër të mbyllet procesi”, tha një nga ekspertët e majtë.
Gjatë mbrëmjes së sotme ekspertët e majtë vijuan punën me draftin ekzistues të mazhorancës, por nesër do të vendoset nëse do të shkojnë dy drafte në Komisionin e Venecias apo një i përbashkët.
Ajo që duket është se shanset për kompromis janë të pakta pasi nesër përfundon afati për dorëzimin e draftit në Komisionin Ad Hoc që do ta miratojë draftin dhe dërgojë në Komisionin e Venecias.
Ekspertët e opozitës braktisën mbledhjen gjatë pasdites me pretendimin se nuk kishte dakordësi për shumë pika të draftit.
