Mungesa e votës së opozitës për disa projektligje që kanë të bëjnë me Reformën në Drejtësi, ka bërë që maxhoranca të mos i ketë 84 votat për ti votuar këto projektligje në seancën e sotme plenare që është edhe e fundit për këtë sesion parlamentar.
Mungesa e dakordësisë ka bërë që këto projektligje të mbeten për në muajin shtator gjithmonë nëse do të gjendet gjuha e përbashkët.
Kreu i Komisionit të Ligjeve Ulsi Manja duke folur jashtë Kuvendit, kërkoi fillimisht konsensusin e opozitës për projektligjin e magjistratëve për të cilin duhen po ashtu 84 vota për miratim.
“Projektligji për magjistratët është votuar njëherë me 84 vota në mandatin e kaluar dhe aktualisht duke qenë se dy organet reja të drejtësisë nuk janë krijuar ende për të bërë emërimin e magjistratëve të ri propozimi ynë synon që këtë ta bëjë direkt ligji në një dispozitë tranzitore. Ne nuk i kemi 84 vota, por kjo nuk na pengon që ne të shohim njëri-tjetrin në sy dhe të themi disa të vërteta për reformën në drejtësi.
Opozita nuk e kupton si duhet reformën në drejtësi. Çfarë e keqe mund ti vijë opozitës nga magjistratura. S’ka kolaps në sistemin e drejtësisë. Kushtetuta s’ka dhënë recetë për kapsllëkun e opozitës”- tha Ulsi Manja.
